Po ndodh ajo që pritej, pra rritja e numrit të të infektuarve, për shkak të shkeljeve të masave anti-COVID gjatë fushatës elektorale. Shefi i Urgjencës Kombëtare, Skënder Brataj tregon se thirrjet për COVID-19 janë shtuar ndjeshëm. Gjithashtu edhe vizitat në banesa dhe ka pasur një rritje të lehtë të të shtruarve në spitale.
“Patëm disa ditë që qendrën e Urgjencës Kombëtare ishin zero kërkesat për tampon, tani kanë filluar janë rritur, 7-15 në 12 orë. Po vihet re edhe një rritje e lehtë e shtrimeve në spital. Nëse këto kohë kishim 10-12 tani kanë shkuar deri në 20 numri i të shtruarve në ditë.”, ka thënë Skënder Brataj për A2.
Brataj thotë se kurba e infektimeve sa do të vijë dhe do të rritet për të kapur pikun e saj në javën e tretë të majit. Gjithashtu ai pranon se rritjen më të madhe do ta kenë zonat rurale që kanë qenë edhe disi më të mbrojtura nga infektimet.
“Tubimet dhe grumbullimet më të mëdha u bënë ditët e fundit dhe duhen 2-3 javë për të parë se sa do te jetë rritja. Kuptohet që do të ketë një rritje fiziologjike më të vogël se herët e tjera, por mosrespektimi i masave po e tregon më së miri këtë.”, ka thënë Brataj.
Drejtori i Urgjencës Kombëtare shprehet kritik ndaj të gjitha forcave politike të cilat shpërfillën masat anti-Covid, në fushatë, për zgjedhje por edhe gjatë tubimeve festive.
“Këtë muaj pati shkelje nga të gjitha palët, nga të gjitha format gjë që do të vërtetohet ditët në vijim. Ne specialistët nuk mund të bëjmë më shumë se sa të këshillojmë dhe të informojmë se në këto situata rrezikojmë shëndetin tonë.”, ka përfunduar Shefi i Urgjencës Kombëtare.
