Mbrëmjen e sotme, ministri i Rindërtimit dhe koordinatori për situatën ekonomike, Arben Ahmetaj, ishte i ftuar në ‘Opinion’, ku ka folur rreth masave të marra nga qeveria për shmangien e krizës ekonomike të shkaktuar nga COVID-19.
Ahmetaj është shprehur se qeveria nuk do të paguajë asnjë lloj qiraje pasi nuk mund të sigurojë të ardhurat dytësore, siç është qiraja, por vetëm të ardhurat parësore, që do të thotë, pagën.
Ahmetaj ka shpjeguar se si do të funksionojë paketa e masave të ndërmarra nga qeveria për shtresat e ndryshme të qytetarëve, duke thënë se është e fokusuar në tri grupe përfituesish dhe kryesisht tek qytetarët të cilët janë në nevojë.
Mirëpo, teksa po fliste rreth planeve të qeverisë ai u përfshi në një debat me moderatorin Blendi Fevziu, pasi ky i fundit i kërkoi të mbaronte shpejt fjalën.
Ministri i tha se kur fton ish-kryeministrin Sali Berisha nuk sillet kështu, duke i ndërprerë fjalë, gjë e cila e ka nervozuar Fevziun i cili i është kthyer duke i thënë se nuk ka parë asgjë dhe nuk mund të bëjë replika e agresion në studio e tij.
Pjesë nga debati
Ahmetaj: Një minutë të mbarojë, se kur bën Saliu të njëjtën gjë nuk ia kthen.
Fevziu: Tani, se ç’i kthejë unë Saliut s’të jap përgjigje ty, more vesh apo jo? Ti s’ke parë gjë hiç dhe mos bëj as trimin, as të fortin këtu të më tregosh Saliun e asnjë tjetër. Jepu përgjigje qytetarëve atje për lekët dhe mos qesh fare se është situatë katastrofike…ka qytetarë që po rrinë pa bukë…
Ahmetaj: Të lutem…
Fevziu: Ta ndërpresë fjalën, s’të lë fare. S’mund të më bësh replikat mua në studio.
Ahmetaj: Po tani replika do bëjmë…
Fevziu: Nuk ke të drejtë ti të bësh agresion në studio. As ti dhe asnjeri në këtë botë.
