Një hetim i emisionit investigativ “Vetting” ka zbuluar shkelje të rënda në sistemin e ushqimit dhe punësimeve në kopshtet dhe çerdhet shtetërore të Bashkisë Përmet për vitin 2025. Pavarësisht tenderëve me vlerë miliona lekë, fëmijëve u ofrohen ushqime të cilësuara si të papërshtatshme nga dietologët, ndërsa paralelisht janë bërë emërime në administratë në kundërshtim me ligjin.
Listë ushqimesh që ngre pikëpyetje
Sipas dokumenteve të siguruara nga “Vetting”, lista e miratuar e ushqimeve për institucionet parashkollore është e unifikuar në të gjithë vendin, por përmban produkte që nuk rekomandohen për fëmijët e vegjël. Në veçanti, përdorimi në sasi të mëdha i tërshërës, trahanasë, pluhurit të pjekjes, miellit të misrit dhe limonëve ka ngjallur shqetësim, pasi këto produkte nuk janë të përshtatshme për fëmijët deri në pesë vjeç, sipas specialistëve të ushqimit.
Ndërkohë, lista përfshin edhe artikuj si bukë integrale në sasi prej 5 mijë kg, djathë kaçkavall, fruta të ndryshme dhe kanellë, për të cilat prindërit thonë se nuk shihen kurrë në pjatat e fëmijëve. Në praktikë, ushqimet që u jepen fëmijëve janë më së shumti mëngjese të vakëta dhe supa të thjeshta për drekë, shumë larg asaj që përshkruhet në dokumentet zyrtare të tenderimit.
Emërime në kundërshtim me ligjin
Përveç problematikës së ushqimit, hetimi nxjerr në pah edhe shkelje në procedurat e punësimit në administratën vendore. Emërime të kryera nga kryetarja e Bashkisë Përmet janë bërë pa garë publike dhe jashtë kritereve ligjore, duke shkelur Kushtetutën e Republikës së Shqipërisë.
Në mesin e emrimeve janë:
• M.K., si Përgjegjës i urbanistikës dhe planifikimit të territorit,
• J.XH. dhe E.S., si punonjës pyjesh,
• J.P., si specialist i bujqësisë.
Këto punësime, të kryera pa procedura konkurrimi, bien ndesh me interesin publik, parimin e barazisë përpara ligjit dhe krijojnë rrezik për funksionimin korrekt të institucionit. Sipas nenit 107, pika 2 të Kushtetutës, “Nëpunësit në administratën publike caktohen me konkurs, me përjashtim të rasteve të parashikuara nga ligji”.
Për këto shkelje, përgjegjës direkt janë identifikuar znj. A.H., Kryetare e Bashkisë Përmet dhe znj. P.H., Përgjegjëse e Sektorit Juridik dhe Burimeve Njerëzore, të cilat mund të përballen me pasoja administrative dhe ligjore.
Ky skandal ngre shqetësime serioze mbi mënyrën e menaxhimit të fondeve publike dhe mbrojtjen e shëndetit të fëmijëve në institucionet arsimore të hershme në Përmet.
