Federata e Futbollit të Kosovës (FFK) dënoi ashpër provokimet dhe sjelljet raciste që ndodhën gjatë ndeshjes mes Rumanisë dhe Kosovës në Bukuresht, në kuadër të UEFA Nations League.
Ndeshja u ndërpre pas thirrjeve të përsëritura raciste dhe anti-Kosovë nga tifozët rumunë, të cilët shfaqën sjellje që cënojnë rëndë parimet e fair play-it dhe vlerat e futbollit, duke shkelur rregulloret e UEFA-s.
Gjatë ndeshjes u dëgjuan thirrje si “Kosovo is Serbia” dhe “Serbia, Serbia”, u fishkëllyem gjatë himnit kombëtar të Kosovës, ndërsa në stadium u hodhën sende të forta dhe u bënë provokime të tjera të papranueshme, duke krijuar një atmosferë të pasigurt për lojtarët kosovarë.
FFK kishte paralajmëruar dy herë UEFA-n për mundësinë e incidenteve të tilla, një herë disa ditë para ndeshjes dhe më pas disa minuta para fillimit të saj.
Pavarësisht këtyre paralajmërimeve, tifozët rumunë vazhduan me sjellje diskriminuese, duke detyruar ekipin e Kosovës të largohej nga fusha për shkak të mungesës së sigurisë dhe dinjitetit.
Ndeshja u tensionua për shkak të refuzimit të tifozëve për të ndalur thirrjet raciste.
Trajneri i Kosovës, z. Foda, tentoi të qetësonte situatën dhe të siguronte vazhdimin e lojës, por sjelljet fyese vazhduan edhe gjatë ndërprerjes.
Në këto kushte, lojtarët zgjodhën të respektojnë rregulloret anti-racizëm të UEFA-s, duke mbrojtur dinjitetin e shtetit të Kosovës si anëtar i barabartë i UEFA-s dhe FIFA-s.
