Është liruar nga detyra konsulli shqiptar në Janinë Pervin Gjikuria, pas skandalit me pasaportat shqiptare në Greqi.
Ndërkohë ambasadorja shqiptare në Greqi Adriana Hobdari vijon të jetë në detyrë, por ndaj saj është ndërmarrë proces disiplinor nga Ministrja e Jashtme Shqiptare.
Për skandalin e pasaportave kujtojmë se ato fillimisht u bllokuan nga dogana greke në Kakavijë pasi transporti ishte në shkelje të procedurave.
Pasaportat ishin futur në çanta, me të cilat zakonisht transportohen rroba, dhe pa asnjë shoqërues të ministrisë ishin dërguar me linjën e autobusëve Tiranë-Athinë. Kjo dërgesë ka krijuar dyshime dhe çantat janë bllokuar nga policia greke në Kakavijë.
Por skandali nuk mbaron këtu, pasi një pjesë e tyre janë vjedhur në Athinë. Një punonjës i ambasadës tonë i tërhoqi pasaportat nga Kakavija, por makina me të cilën po i transportonte është vjedhur në një parkim në Athinë.
