Kostot e koncesioneve në shëndetësi po vazhdojnë të rriten nga viti në vit.
Së fundmi, kostoja e koncesionit të sterilizimit të pajisjeve për ndërhyrjet kirurgjikale, ka dalë jashtë kontrollit, shkruan “Top Channel”.
Në buxhetin e 2019-ës, fatura e sterilizimi ishte 12.3 miliardë lek ose 100 milion euro, por në tabelat që i janë bashkangjitur buxhetit të vitit të ardhshëm, koncesioni është rritur në 16.5 miliardë lek ose 135 milion euro.
Nga diferenca rezulton se kosto për një vit është rritur me 35 milion euro.
Tenderi për këtë koncesion u zhvillua në vitin 2014.
Fituese u shpall një bashkim i përbërë nga 4 shoqëri, tre prej të cilave italiane nga rajoni i Umbrias dhe “Investital”.
Kjo e fundit zotëron 40% të koncesionit, nuk ka eksperiencë për këtë lloj shërbimi dhe zotërohet nga një emigrant shqiptar në Itali, i quajtur Ilir Rrapaj.
Ishte pikërisht përfshirja e kësaj kompanie në koncesion që ngriti dyshime të mëdha.
Gjithashtu dyshimet u forcuan me kalimin e viteve, kur u zbulua se kontrata ishte pa tavan.
Pavarësisht rritjes me 35 milion euro, Ministria e Shëndetësisë ka urdhëruar spitalet publike, të kufizojnë operacionet në shtet deri në 90 ndërhyrje, pasi koncesionari nuk pranon të bëjë sterilizimin pa para shtesë.
