Një tjetër skandal me produktet bujqësore shqiptare ka tronditur tregjet europiane. Pas një kompanie në Slloveni që kërkoi tërheqjen nga tregu të specave shqiptarë me pesticide, reagimi zyrtar ka ardhur edhe nga Bashkimi Europian përmes “RASFF”, agjencisë së tij për sigurinë ushqimore.
Në njoftimin e fundit, kjo agjenci konfirmon se në specat e eksportuar nga Shqipëria janë zbuluar tre pesticide të rrezikshme: Formetanate, Acetamiprid dhe Flonicamid. Për pasojë, BE ka njoftuar menjëherë Shqipërinë si vend origjine, si dhe Austrinë, Kroacinë dhe Slloveninë, ku do të dërgoheshin këto ngarkesa. Ishte pikërisht Sllovenia që ngriti e para alarmin duke kërkuar tërheqjen nga tregu të produkteve.
Ky rast i fundit vjen pas një serie skandalesh me produkte shqiptare të bllokuara në kufijtë e BE-së. Vetëm pak ditë më parë, Kroacia refuzoi një ngarkesë me pjeshkë shqiptare pasi u zbulua përmbajtje e lartë nikeli. Po kështu, mandarinat e kontaminuara dhe luleshtrydhet e kompanisë “Geri shpk” me pesticide të ndaluara kanë përfunduar në tregun vendas, duke vënë në rrezik konsumatorët shqiptarë.
Lista e skandaleve nuk ndalet: peshk me parazitin Anisakis, mish derri dhe pule me salmonelë (madje edhe në rrjetin KFC), akullore me oksid etileni kancerogjen, qumësht i prishur nga “Lufra” dhe minj mbi thasët e miellit në kompaninë “Diamond”.
Megjithatë, Autoriteti Kombëtar i Ushqimit, i drejtuar nga Olsi Komici, vijon të mbetet i heshtur, ndërsa Ministria e Bujqësisë me në krye Anila Denajn justifikohet me “mungesë laboratorësh” apo “sekret komercial”. Në realitet, bëhet fjalë për një zinxhir korrupsioni e neglizhence që rrezikon çdo ditë shëndetin e qytetarëve.
Eksperti i sigurisë ushqimore Sokol Abazi ka paralajmëruar se mbi 35 pesticide kancerogjene qarkullojnë lirshëm në tregun shqiptar, duke u përdorur në fruta, perime dhe drithëra. Efektet e tyre janë fatale: kancer, çrregullime nervore e riprodhuese, dëmtime të organeve jetike.
Megjithë këto paralajmërime, në Shqipëri nuk ka pasur asnjë hetim serioz, asnjë dorëheqje zyrtarësh dhe asnjë garanci për konsumatorët. Prandaj kërkohet që SPAK të nisë menjëherë hetime për aferat e AKU-së dhe Ministrisë së Bujqësisë.
Në mungesë të përgjegjësisë institucionale, qytetarëve u mbetet vetëm reagimi: bojkotimi i produkteve të dyshimta dhe kërkesa e fortë për llogaridhënie. Shqipëria nuk mund të kthehet më në kosh plehrash të ushqimeve të kontaminuara, ndërsa burokratët pasurohen mbi shpinën e popullit.
