Ministria u përfshi në një megaskandal që u zbuluar nga hetuesit e OLAF, të cilët nxorrën në dritë abuzimin e madh me fondet e Bashkimit Europian për bujësinë shqiptare. Si pasojë e këtij hetimi BE vendosi që të ndërpresë fondet, që solli ndërprerje të pagesave edhe për ato që kishin përfituar. Por skandali sa vjen e thellohet! Oligarkia.al ka mësuar se javët e fundit AZHBR u ka nisur letër dhjetra bizneseve, të cilat kanë përfituar grante, duke u kërkuar të kthejnë paratë mbrapsh.
Pak javë më parë, portali Amfora publikoi një informacion zyrtar, sipas të cilit deri në fund të majit AZHBR u kishte kërkuar kthimin e parave të përfituara nga grantet rreth 10 subjekteve, mes të cilave kompanisë Coast to Coast të biznesmenit Florenc Gjikuria si dhe asaj Kavaljon në pronësi të ish kryetarit të bashkisë së Kavajës, Elvis Rroshi. Kujtojmë se para 2 ditësh kryeministri Rama bëri ndryshime në qeveri, një prej të cilave ishte edhe ndryshimi i ministres së Bujqësisë, Frida Krifca dhe në vend të saj u emërua Anila Demaj. Shkarkime apo ndërrime të tilla postesh në qeverinë Rama nuk janë të panjohura, pasi ndodhin sa herë ka afera apo skandale për të cilat do ketë hetime. Kujtojmë rastin e Ahmetaj që u shkarkua nga posti i zv. kryeministrit dhe pak kohë më pas u shpall në kërkim nga SPAK për inceneratorët.
E njëjta gjë po ndodh edhe në rastin e ministrisë së Bujqësisë me shpërdorimin e fondeve të IPARD. Por tashmë ka lindur edhe një problem tjetër, pasi jo vetëm AZHBR kërkon paratë mbrapsht nga subjektet, por edhe subjektet që kanë përfituar grante përmes korrupsionit po kërkojnë paratë nga sekserët apo zyrtarët e AZHBR-së.
Një katrahurë korrupsioni dhe paligjshmërie, që tani mund të çojë edhe në konflikte fizike, pasi zakonisht këta që marrin rryshfetet operaojnë me moton “paratë e marra nuk kthehen më.”
Zyra kundër mashtrimit në BE, e njohur me emrin OLAF ka kallëzuar prej kohësh në prokurori abuzimet masive të dala në dritë nga hetimi i saj.
Por prej më shumë se dy vite, organi shqiptar i akuzës i ka zvarritur hetimet duke mos vënë asnjë zyrtar përgjegjës përpara ligjit. Megjithatë, përpjekjet e prokurorisë për të mbytur aferën apo hezitimi i saj për të hetuar deri në fund, nuk kanë mundur ta shpëtojnë qeverinë nga reperkursionet e skandalit.
Faktori grek
Brenda strukturave të Bashkimit Europian, çështja e abuzimeve me fondet e IPARD nga qeveria shqiptare po mbahet në qendër të axhendës veçanërisht nga Greqia. Pas përplasjeve mes Tiranës dhe Athinës zyrtare për arrestimin e Fredi Belerit, qeveria greke është duke kërkuar me prioritet zbardhjen deri në fund të skandalit të granteve dhe vendosjen e qeverisë shqiptare përpara përgjegjësive.
Ndërkohë që një tjetër front ku Athina po “hakmerret” është skandali i vjedhjes së pronave të bregdetit. Dy ditë më parë, kryeministri Edi Rama u detyrua të shkarkojë nga kabineti ministren e Bujqësisë, Frida Krifca dhe atë të jashtme Olta Xhaçka.
E para shihet si përgjegjëse direkte për skandalin me fondet e BE-së për bujqësinë gjatë kohës që drejtonte AZHBR-në, ndërsa Xhaçka akuzohet si e përfshirë në skandalin e tjetërsimit të pronave në bregdet, duke u kallëzuar pak ditë më parë në SPAK nga Fredi Beleri për tokën mbi të cilën bashkëshorti i saj po ndërton hotelin në Himarë.
