Prej disa ditësh një rrjet kompanish të transportit urban janë përfshirë nga një skandal i përmasave të mëdha pas zbulimit të falsifikimit të qindra mijëra biletave duke krijuar përfitime të paligjshme si dhe duke kryer evazion fiskal.
Pas hetimeve, policia ka vënë në pranga biznesmenin Ferdinand Ibrahimi, djalin e këtij të fundit Anastas Ibrahimi të cilit iu gjetën në makinë biletat e falsifikuara, biznesmenin Fatos Vrapi, bashkëshorten e tij Albana Vrapi, menaxherin i kompanisë “Alba Trans” Aldi Duka, Erisa Vora dhe Klodiana Qato.
Së fundmi, “Shqiptarja.com” ka zbardhur dhe përgjimet telefonike ku mësohet se Ferdinand Ibrahimi, teksa ndodhej i rrethuar nga policia në shtëpinë e tij, ka telefonuar të birin Anastasin dhe i ka kërkuar të djegë dokumentet, me siguri referuar biletave false.
Kjo bisedë ka ndihmuar policinë të gjurmojë biletat që më pas u gjetën në makinën luksoze tip Maserati të Anastas Ibrahimit, në një valixhe ngjyrë blu.
“Shqiptarja.cpm” bën të ditur se informacioni paraprak që ka çuar në zbulimin e këtij skandali ka dalë nga Shtypshkronja e Letrave me Vlerë, ku bëhet dhe printimi i biletave të autobusëve. Sakaq ditën e sotme pritet që të arrestuarit të dalin para togave të zeza për t’u njohur me masën e sigurisë që do të caktojë trupa gjykuese, për skandalin që mësohet t’i ketë kushtuar plot 1 miliard lek shtetit shqiptar.
