Skandali i kompanisë “DH Albania” duket se po merr rrugën që duhet të kishte marrë që në fillim. Bëhet e ditur se ditën e sotme ARRSH ka depozituar një kallzim penal pranë Prokurorisë së Tiranës. Mësohet se kallzimi përmban dy akuza ku njëra është për falsifikim të dokumentave të hedhura në tender dhe tjetra për mashtrim të instancave shtetërore.
Burime për “BalkanWeb” raportojnë gjithashtu se Autoriteti Rrugor Shqiptar, i ka nisur edhe një shkresë Agjencisë së Prokurorimit Publik, për të përjashtuar nga tenderat bashkimin e kompanive “BibaX” dhe “DH Albania”, dhe pritet të shpallë së shpejti rihapjen e tenderit për lotin e parë të Unazës së Madhe.
Skandali i “DH Albania” ka plasur pak ditë më parë, ku përmes medias u zbulua se kompania në fjalë arriti të fitonte të drejtën për të ndëruar mbikalimin dhe një pjesë të projektit të Unazës së Re me vlerë 18 milion euro. Pas publikimit të këtij fakti, më vonë u publikua edhe një garë tjetër e fituar nga kompania e cila kishte të bënte ndërtimin e linjës 220 kv Burrel-Peshkop, me një vlerë 11.7 milion euro.
