Një denoncim i fortë ka ngritur shqetësime mbi trajtimin e trashëgimisë kulturore në jug të vendit. Një qytetare shqiptare e lindur dhe rritur në Itali ka ndarë përvojën e saj të zhgënjyer gjatë një vizite në Kalanë e Lëkurësit në Sarandë, ku hyrja tashmë kushton 500 lekë ose 5 euro për person, pa përfshirë asnjë konsum apo shërbim tjetër brenda mureve të kalasë.
“Aq e rëndë sa nuk të lënë as të bësh një foto nga jashtë nëse nuk paguan. Turistët u përzinin sikur ishin të padëshiruar. Shumica u kthyen mbrapsht, të habitur dhe të zhgënjyer,” shkruan ajo në rrëfimin e saj, duke përshkruar një realitet që bie ndesh me parimet e mikpritjes dhe promovimit të turizmit.
Kalaja, e njohur si një monument kulture dhe pjesë e trashëgimisë kombëtare, është transformuar në një hapësirë tërësisht të privatizuar ku çdo gjë ka çmim, qoftë edhe ajri. Qytetarja thekson se për vite me radhë ka darkuar aty me familjen, por këtë sezon është ndjerë e përjashtuar nga një vend që dikur ishte i hapur për të gjithë.
“Kanë privatizuar gjithçka,” thotë ajo e revoltuar. Sipas saj, ky komercializim ekstrem po i bën dëm të pariparueshëm turizmit dhe imazhit të Shqipërisë, veçanërisht në sytë e turistëve të huaj që kërkojnë të përjetojnë historinë dhe kulturën shqiptare, jo të përballen me barriera monetare për çdo hap që bëjnë.
Në sfond qëndron heshtja e institucioneve përkatëse, që duket se nuk reagojnë përballë shndërrimit të simboleve historike në objekte të kontrolluara nga interesa private. Kalaja e Lëkurësit ngre një pyetje të qartë e të dhimbshme: A është kjo pasuri pjesë e kujtesës kolektive të shqiptarëve, apo thjesht një xhep fitimprurës që thith euro për çdo klik aparati?
