Vjedhje të thesarit të shtetit nuk ndodhin vetëm në Shqipëri, ose më mirë duhet thënë se edhe vendet fqinjë po na kopjojnë ne në këtë aspekt.
Fjala është për Kosovën, ku edhe aty dyshohet se është vjedhur thesari i shtetit, ose më mirë një sasi prej plot 2 milionë eurosh të cilat janë zhdukur.
Duket se strumbullari i vjedhjes është një punëtor i Thesarit të Kosovës, me inicialet L.G, i cili dyshohet se ka bërë transferimin e 2,077,995 milionë eurove, përmes katër transaksioneve të ndryshme.
Ai i ka transferuar paratë në adresë të kompanisë “LDA Group Sh.p.k”, me bazë në Llapushnik.
Ky transaksion i dyshimtë është vërejtur nga Drejtoria për Hetim të Krimeve Ekonomike, pas njoftimit nga zyrtarët e Thesarit.
Në dokumentin që e ka parë “Radio Evropa e Lirë”, i dyshuari L.G është nga fshati Komoran, i komunës së Gllogocit, ndërkohë që dy të dyshuarit tjerë, që ende janë në arrati, janë banorë të fshatit Llapushnik.
Policia ka njoftuar zyrtarisht se, të martën në mbrëmje, pas hetimeve të zhvilluara është arritur të arrestohet një i dyshuar dhe dy të tjerë gjenden në arrati.
Bëhet fjalë për personat me inicialet, K.Sh dhe V.Sh, të cilët janë të lidhur me kompaninë në fjalë.
Zyrtarisht është konfirmuar kërkimi i bllokimit të llogarive, pasi që dyshohet se, një pjesë e parave janë transferuar jashtë vendit. Me urdhër të prokurorit, i dyshuari është dërguar në mbajtje.
Ky rast është thënë se ka ndodhur me 10 tetor 2020.
Përmes një konference për media edhe ministrja e Financave në Qeverinë e Kosovës, Hykmete Bajrami, ka konfirmuar se kanë ndodhur katër transaksione të paligjshme në vlerë prej më shumë se 2 milionë eurosh. Ajo e ka cilësuar këtë rast si “të izoluar”.
/Burimi: Radio Evropa e Lirë/GazetaReforma.com/
