Një kthesë e rëndë mori çështja gjyqësore për vrasjen e 33-vjeçarit Erjon Pelivani, pas rrëfimit të vajzës 19-vjeçare të të pandehurit, e cila pranoi në gjykatën e Larisës se kishte falsifikuar mesazhe për të bindur të atin që viktima e kishte abuzuar seksualisht.
I akuzuari, 51-vjeçari Fatmir Tarellari nga Poliçani, përballet me akuzat për vrasje me dashje, armëmbajtje pa leje dhe përdorim arme, pasi më 9 janar 2024, pranë një fabrike çimentoje në Volos, qëlloi me pushkë gjahu dhe plagosi për vdekje kunatin e tij, Pelivanin.
Ngjarja nisi pas një telefonate nga pronarja e banesës ku jetonte vajza e tij studente, e cila njoftoi se nuk ishte paguar qiraja.
Edhe pse Tarellari kishte dërguar paratë rregullisht, vajza justifikoi mospagesën duke thënë se ishte detyruar t’ia dorëzonte dajos për shkak të shantazhit dhe pretendimeve për përdhunim.
Për ta bindur të atin, ajo i tregoi mesazhe që në pamje të parë dukeshin si të dërguara nga viktima.
Më vonë, hetimet e policisë greke zbuluan se SMS-të ishin manipuluar dhe nuk ishin shkruar nga viktima.
Vajza, gjatë dëshmisë, pranoi se i kishte krijuar vetë mesazhet duke përdorur bisedat me të dashurin e saj, në mënyrë që t’i atribuoheshin Pelivanit.
Në gjykatë, Tarellari deklaroi se kishte vepruar në gjendje tronditjeje dhe besonte se po mbronte vajzën e tij.
Ai shprehu keqardhje për atë që kishte ndodhur, duke e quajtur periudhën më të rëndë të jetës së tij. Procesi vijon, ndërsa pritet të përcaktohet përgjegjësia për një krim që tashmë ka marrë një tjetër dimension.
