Një skandal është zbuluar në një klinikë dentare private në Tiranë, ku shërbimet për pacientët ofroheshin duke përdorur preparate dhe materiale dentare të skaduara.
Policia ka arrestuar administratorin e klinikës “Golden Dental & Aesthetic”, Ervin Zeka, 40 vjeç, si dhe stomatologun Kejdi Myzyri, 26 vjeç, pas një kontrolli të befasishëm në ambientet e klinikës në Rrugën e Kavajës.
Gjatë operacionit policor të koduar “Siguria Dentare”, shërbimet e specializuara të Sektorit për Hetimin e Krimeve Ekonomike në bashkëpunim me Forcën e Posaçme “Shqiponja”, sekuestruan një sasi të konsiderueshme materialesh mjekësore të skaduara që datonin që nga viti 2023.
Produktet e ndaluara përdoreshin në trajtime të ndryshme dentare, përfshirë terapi, ortodoncë, kirurgji, si dhe për përpunimin e implanteve dhe protezave.
Hetimet u zgjeruan edhe për 12 punonjës të tjerë të klinikës, të cilët do të përballen me procedime penale në gjendje të lirë.
Dy të arrestuarit përballen me disa akuza të rënda, përfshirë: “Prodhimi dhe tregtimi i barnave dhe pajisjeve mjekësore të falsifikuara ose të rrezikshme për jetën dhe shëndetin”, “Punësimi i paligjshëm” dhe “Fshehja e të ardhurave”.
Materialet procedurale janë referuar në Prokurorinë e Tiranës për veprime të mëtejshme hetimore.
