Një incident serioz i sigurisë bankare ka tronditur klientët e Banka Kombëtare Tregtare, duke nxjerrë në pah një skemë klonimi kartash që çoi në vjedhjen e mijëra eurove nga llogaritë e qytetarëve. Rasti, i cili ka dalë në dritë që prej një dite, nuk bëhet fjalë për një episod të vetëm, por për një zinxhir ngjarjesh që tregojnë se të dhënat bankare të klientëve janë komprometuar dhe përdorur në mënyrë të paligjshme jashtë Shqipërisë.
Sipas denoncimeve të bëra publike, disa qytetarë konstatuan se llogaritë e tyre ishin zbrazur pa kryer asnjë transaksion dhe pa pasur kartat fizike jashtë kontrollit të tyre. Hetimi paraprak i rasteve tregoi se kartat e klonuara ishin përdorur në shtete të ndryshme europiane. Në një rast konkret, karta e një klienti rezultonte aktive në Bullgari, ku ishin kryer blerje me vlerë mijëra euro. Në raste të tjera, paratë ishin tërhequr ose shpenzuar në Itali, duke ngritur dyshime serioze mbi një rrjet të organizuar që vepron përtej kufijve.
Në një reagim për mediat, Banka Kombëtare Tregtare pranoi se kartat e klientëve ishin klonuar përmes një bankomati në Tiranë. Sipas sqarimit zyrtar, autorët kishin instaluar një kamerë të fshehtë në automat, me qëllim regjistrimin e të dhënave të kartave dhe kodeve PIN të qytetarëve që kryenin veprime bankare.
BKT deklaron se kjo thyerje e sigurisë ka zgjatur vetëm rreth një orë dhe se është konstatuar nga stafi i saj teknik, çka sipas bankës ka bërë të mundur ndërprerjen e menjëhershme të skemës. Po ashtu, banka pohoi se numri i kartave të klonuara është i kufizuar. Megjithatë, pavarësisht këtij pretendimi, dëmet financiare për qytetarët e prekur kanë qenë reale dhe në disa raste të konsiderueshme.
Në reagimin e saj zyrtar, Banka Kombëtare Tregtare ka garantuar se të gjithë klientët që kanë rënë pre e kësaj skeme do të rimbursohen plotësisht për shumat e vjedhura. Ngjarja, megjithatë, ka ngritur pikëpyetje të forta mbi sigurinë e bankomatëve, monitorimin e tyre dhe masat reale që merren për mbrojtjen e të dhënave bankare të qytetarëve, veçanërisht kur një thyerje sigurie në Tiranë përfundon me tërheqje parash në vende të tjera të Europës.
