Situata e COVID në spitalin |”Shefqet Ndroqi”paraqitet mjaft kritike teksa bëhet me dije se një 22-vjeçare është në gjendje të rëndë në intubim pasi ka sjellë në jetë foshnjën e saj. Lajmin e ka bërë të ditur Ora news teksa mësohet se në lindje kanë asistuar edhe mjekët e maternitetit “Koço Gliozheni”. E reja ka qenë në muajin e fundit të shtatazanisë teksa lindja është bërë e mundur vetëm me anë të operacionit cezarian. Vetëm një ditë më parë një e re 28-vjeçare humbi jetën pasi lindi foshnjën në muajin e shtatë të shtatzanisë.
Ndërkohë, News 24 raporton se spitali COVID 2 (Sanatoriumi) është plot dhe janë ezauruar 220 shtretër. Një pacientë që mbërriti me një ambulancë të Elbasanit ka pritur rreth dy orë që të lirohej një shtrat në mënyrë që të merrte shërbimin. Pacienti rreth 60-vjeç ka qenë në gjendje të rëndë shëndetësore, ndërsa mjekët e monitoronin shpesh brenda ambulancës ku po mbahej. Vetëm brenda dy orësh, nga ora 11:00 deri në 13:00 kanë mbërritur pesë urgjenca mjekësore me pacientë në gjendje të rënduar, të cilët janë detyruar të presin së paku 30 minuta. News 24 bën me dije gjithashtu se brenda 24 orëve në urgjencën e Sanatoriumit kanë mbërritur 35 ambulanca dhe kanë ndërruar jetë katër persona.
