KAKAVIJË
Situata në pikën kufitare të Kakavijës sa vjen dhe përkeqësohet, për shkak të radhës të madhe të makinave, që po presin të hyjnë në Greqi.
Qytetarët kanë 3 ditë që presin dhe janë torturuar në pritjen e gjatë.
Ata kanë nisur të revoltohen, duke kërkuar që të dalin në anën tjetër të kufirit, në Greqi.
Qytetarë të shumtë kanë dalë nga automjetet dhe kanë bllokuar rrugën, në shenjë proteste e indinjate.
Tashmë, përpos problemit të radhës së gjatë të automjeteve në pikë kufitare, krijohet edhe rreziku i përhapjes së mëtejshme të virusit, pasi qytetarët mblidhen në turma.
Pala greke nga ana e saj nuk qëndron gjithmonë hapur, ndërsa ka vendosur edhe si kusht testin e Covid-19 për qytetarët që duan të kalojnë për në Greqi.
Shumë pak qytetarë kanë kaluar në anën tjetër të kufirit. Në 24 orët e fundit, vetëm 750 shqiptarë kanë arritur të dalin nga Kakavija në territorin grek.
