Ministri italian i Shëndetësisë, Roberto Speranza, ka njoftuar sot vendimin e qeverisë italiane, për të rihapur muzetë në zonat e vendit më pak të prekura nga epidemia e Covid-19.
Gjithashtu ministri komunikoi në Parlamentin italian se për shkak të situatës nga pandemia, qeveria do të zgjasë gjendjen e jashtëzakonshme deri më 30 prill.
“Muzetë, vende simbolike të kulturës së vendit do të rihapen në zonat e verdha”, deklaroi ministri Speranza para deputetëve.
Ndër të tjera, në Parlamentin italian, ministri i Shëndetësisë ilustroi në foltoren përpara deputetëve edhe masat e reja të luftës kundër epidemisë së covid-19, e cila ka shkaktuar deri më tani rreth 80.000 të vdekur në Itali.
Sipas Ministrit Speranza, qeveria Conte ka vendosur që këto masa të reja të hyjnë në fuqi duke nisur nga 16 janari.
Ndërkohë kujtojmë se aktualisht njëzet rajone të Italisë janë të ndara në tre kategori zonash, në zonat e verdha, zonat portokalli dhe zonat e kuqe, në funksion të vijueshmërisë të situatës epidemiologjike lokale, ku çdo javë situata është monitoruar nga një komitet shkencor.
Ministri i Shëndetësisë, Speranza, njoftoi gjithashtu vullnetin e qeverisë për të zgjatur deri më 30 prill gjendjen e jashtëzakonshme si pasojë e epidemisë.
Kujtojmë se situata nga pandemia në Italia ka qenë e vështirë, pasi është edhe një nga vendet më të prekura evropiane, sidomos gjatë valës së parë të koronavirusit.
Autoritetet shëndetësore atje kanë rritur vigjilencën edhe pas regjistrimit të rasteve të para me variantin e ri të covid-19, i cili fillimisht shpërtheu në Britaninë e Madhe dhe sipas ekspertëve është më i transmetueshëm te njerëzit se sa koronavirusi ekzistent me zanafillë nga Ëuhani i Kinës. /Gazetareforma.com/
