Ish-kryeministri i Kosovës, Ramush Haradinaj me anë të një postimi në rrjetet sociale ka sulmuar qeverinë Kurti lidhur me menaxhimin e pandemisë së COVID-19. Sipas Haradinaj largimi i ministrit Vitia nga përgjegjësitë shtetërore dhe kalimi i vëmendjes së tij tek gara zgjedhore, tregon edhe një herë fytyrën e vërtetë të “qeverisë së mashtrimit”. Ai vazhdon më tej duke thënë se qeveritarët të cilët i quan mashtruesa do të vendosin masa kufizuese të cilat sipas tij do e çojnë ekonominë e Kosovës drejt shkatërrimit.
Haradinaj ka theksuar se qeveria sipas tij nuk ka interes për situatën në të cilën ndodhet vendi.
Statusi nga Ramush Haradinaj
Në kohën kur situata pandemike është jashtë kontrollit dhe Kosova po shënon numër të lartë të rasteve me infeksion, mashtruesit kanë vendosur që ministrin e Shëndetësisë, ta kandidojnë për kryetar të Prishtinës.
Largimi i ministrit Vitia nga përgjegjësitë shtetërore dhe kalimi i vëmendjes së tij tek gara zgjedhore, edhe njëherë e shpërfaq fytyrën e vërtetë të Qeverisë së mashtrimit.
Kjo qeveri, para interesave të ngushta politike, duhet të ketë interesat e shtetit dhe të përkushtohet në menaxhimin e gjendjes së rëndë shëndetësore në vend, që çdo ditë po merr jetë të qytetarëve.
Koston e kësaj gjendjeje, do ta paguajnë jo vetëm pacientët e stafi mjekësor, por edhe ekonomia e vendit, me masat që këta mashtrues do t’i vendosin, ashtu siç mbyllën vendin dhe shkatërruan ekonominë vitin e kaluar.
Pavarësisht nga mosinteresimi i Qeverisë, lus stafin shëndetësor në nivel vendi, që të vazhdojnë të japin kontributin e tyre në kujdesin për qytetarët e Kosovës.
RH
