Deputetja e Partisë Demokratike Jorida Tabaku ka reaguar ditën e sotme me një postim në rrjetin e saj social “Facebook” ku ka shkruar mbi të dhënat e publikuara për Shqipërinë nga Fondi Monetar Ndërkombëtar, të cilat i quan’ simptomat e një ekonomie në krizë’.
Tabaku shprehet se dështimi i menaxhimit të të ardhurave për shkak të informalitetit të lartë dhe keqmenaxhimit të taksave, si dhe dështimi i shpenzimeve për shkak të investimeve jo efiçente, ka bërë që shqiptarët të paguajnë më shumë për të blerë më pak, duke filluar që nga ushqimet.
Sipas saj, borxhi i lartë publik, inflacioni i çmimeve dhe të gjitha politikat ekonomike të qeverisë, bëjnë që Shqipëria e Ramës të jetë më e varfër, ndërkohë që koncesionarët bëhen më të pasur.
Postimi i plotë
Simptomat e një ekonomie në krizë, sipas FMN
Qeveria po dështon në manaxhimin dhe rritjen e të ardhurave në buxhet edhe si pasojë e informalitetit të lartë dhe keqmanaxhimit të taksave.
Qeveria po dështon tek shpenzimet, investimet janë jo eficente dhe qytetarët e ekonomia nuk fitojnë prej tyre.
Me pak fjalë investimet nuk prodhojnë rritjen e dëshiruar ekonomike, rritjen e punësimit dhe një shëndet më të mirë të ekonomisë.
Situata me PPP është në kufijtë e çmendurisë, ato zënë 50% të PBB-së për vitin aktual duke e kthyer buxhetin e shqiptarëve në portofolin e miqve të qeverisë.
Borxhi Publik pritet të rritet edhe më tej jo vetëm si pasojë e rritjes së PPP-ve por edhe si pasojë e rritjes së normave të interesit.
Më e rënde situata me shqiptarët që do të paguajnë më shumë për të blerë më pak ushqime. 51% e të ardhurave të familjeve tona shkon për ushqim dhe energji elektrike, do na shkojë edhe më shtrenjtë!
Transparenca me kontratat, me vendosjen e politikave fiskale dhe ligjeve kanë ndikuar në krijimin e një klime armiqësore me biznesin dhe taksapaguesit por mbi të gjitha që vendosin në pikëpyetje buxhetin në lidhje me PPP.
Mungesë e plotë transparence se sa nga taksat e qytetarëve janë shpenzuar për shqiptarët gjatë pandemisë dhe sa i kanë shkuar në xhep koncesionarëve.
Mungesë e plotë transparence për fondet e rindërtimit ndërkohë që gjasat janë që keqpërdorimi është disa milionësh.
Ndërkohë që lufta kundër informalitetit ka prodhuar një ekonomi edhe më shumë informale.
Shenjat tregojnë se rritja e çmimeve do t’i bëj edhe më shumë dëm të ardhruave të shqiptarëve që do të bjerren nga pesha e inflacionit dhe rritjes së çmimeve.
Shqipëria e Ramës është ajo e varfëruar, me korrupsion, buxhet të shndërruar në portofolin e koncesionarëve dhe oligarkëve. Kjo nuk është qeveria e qytetarëve por e oligarkëve që abuzojnë në kurrizin dhe nga djersa e qytetarëve.
