Pasditen e sotme bëri bujë një video ku shihej një makinë tip “Mercedes Benz “, tek xhironte dhe bënte manovra para Komisariatit të Policisë Numër 6.
Kjo video ishte postuar nga faqja “RichKidsTirana” dhe ishte shoqëruar me mbishkrimin “Sipër shtetit”.
Së fundmi, policia ka shoqëruar në komisariat drejtuesin e mjetit, një shtetas 29-vjeçar.
Pas publikimit të videos policia organizoi kontrolle të shumta dhe në fund arriti të arrestonte në Unazën e Re.
29-vjeçari ndodhet në komisariat ku po kryhen dhe verifikimet e nevojshme, me qëllim procedimin penal të personit përgjegjës për veprimet dhe sjelljet e rrezikshme në rrugë, si dhe procedimin administrativ për shkeljet e rregullave të qarkullimit rrugor të konsumuara nga drejtuesi i këtij automjeti.
Njoftimi i plotë
“Tiranë
Xhiroi gomat dhe bëri manovra të rrezikshme në rrugë, para Komisariatit të Policisë Nr. 6 dhe u largua me shpejtësi, por kapet nga Policia Rrugore 29-vjeçari nga Tirana dhe shoqërohet në Komisariatin Nr. 6, për veprime të mëtejshme.
Nisur nga postimi në disa portale online, ku shfaqej një automjet i markës Mercedes Benz me ngjyrë të bardhë duke bërë manovra të rrezikshme dhe xhirime gomash në rrugën “Llazi Miho”, përpara Komisariatit të Policisë Nr. 6 Tiranë, shërbimet e Policisë, pas këqyrjes së pamjeve filmike të kamerave përreth vendit ku drejtuesi i mjetit kishte xhiruar gomat, bënë të mundur identifikimin e automjetit.
Pas identifikimit të të dhënave të automjetit që shfaqej në videon e publikuar, rrugorët e kryeqytetit organizuan kontrolle të shtuara.
Si rezultat i kontrolleve të shtuara, në Unazën e re u bë i mundur ndalimi dhe shoqërimi i drejtuesit të automjetit në ambientet e Komisariatit të Policisë Nr. 6 Tiranë, ku po kryhen dhe verifikimet e nevojshme, me qëllim procedimin penal të personit përgjegjës për veprimet dhe sjelljet e rrezikshme në rrugë, si dhe procedimin administrativ për shkeljet e rregullave të qarkullimit rrugor të konsumuara nga drejtuesi i këtij automjeti, që kanë rrezikuar jetën e tij dhe të përdoruesve të tjerë të rrugës që gjendeshin në afërsi të vendit ku automjeti po kryente manovrat e rrezikshme.
#SfidëKujtdoQëCenonSigurinë
#DenoncoDrejtuesinekeqedukuar
#ManifestoRregullQetësiNë”
