Shëndeti mendor luan një rol jetik në çdo aspekt të jetës sonë, duke ndikuar në mënyrën si mendojmë, sillemi, ndjejmë dhe marrim vendime. Ekspertët këshillojnë që çdo shprehje, edhe kur duket si një fjalë e thënë “kot” nga njerëzit tanë të dashur ose ata që na rrethojnë, duhet marrë seriozisht kur bëhet fjalë për çështje të shëndetit mendor.
“Mund të shqetësohemi kur një person që ka qenë shumë aktiv fillon papritur të mbyllet në vetvete. Një individ që merrte pjesë në të gjitha aktivitetet shoqërore dhe familjare dhe papritmas tërhiqet, duke përdorur lloj-lloj justifikimesh, mund të japë sinjalet e para të një problemi serioz,” shpjegon mjekja psikiatre Valentina Asabella. Ajo shton se një tjetër tregues i rëndësishëm është çrregullimi i gjumit, ku përfshihet gjumi i parehatshëm dhe makthet, të cilat shpesh janë zanafilla e çrregullimeve të ankthit.
Sipas Asabellës, edhe personat që kanë punuar më parë me energji dhe motivim të lartë, por papritmas fillojnë të ndihen të mbingarkuar apo të keqtrajtuar në vendin e punës, mund të jenë në fillimet e një çrregullimi ankthi ose një episodi depresiv.
Një moment kritik që nuk duhet neglizhuar, sipas psikiatres, është kur një person shpreh mendime si “më mirë të kisha vdekur sesa të jetoja”. “Edhe nëse këto fjalë thuhen kot, ato duhet të vlerësohen me shumë kujdes dhe personi duhet inkurajuar të kërkojë ndihmën e profesionistëve të shëndetit mendor”, përfundon Valentina Asabella.
