Në një intervistë për emisionin “Koha për t’u zgjuar”, avokati Erald Aga ka shpjeguar mënyrën sesi qytetarët mund të regjistrojnë ndërtimet e vjetra të ndërtuara para 10 gushtit 1991, të cilat ende nuk kanë tituj pronësie.
Ai theksoi se Ligji nr. 20/2020 u jep të drejtën pronarëve të regjistrojnë ndërtimin dhe truallin përkatës në emër të ndërtuesit, për sa kohë objekti është më i vogël se 300 m² dhe nuk ndodhet në zona të ndaluara si reparte ushtarake, bregdet apo prona shtetërore.
Megjithëse ligji kërkon që institucione si ASHK të përfundojnë procesin brenda gjashtë muajsh, zbatimi i tij në praktikë është vonuar.
Sipas Agës, qytetarët shpesh detyrohen të paraqesin dokumente shtesë si harta të përditësuara dhe deklarata nga fqinjët, edhe pse në ligj kjo nuk është e parashikuar.
Po flasim për ndërtesat e vjetra, përpara 10 gushtit 1991, janë shtëpitë e vjetra, janë objekte pa titull pronësie. Ky ligj 2020/20 ka parashikuar të regjistrohen. Kjo pronë do të duhet të kalojë në emër të pronarit që e ka ndërtuar, edhe trualli i kalon automatikisht ndërtimit. Trualli kalon në emër të pronarit të banesës, kur janë më pak se 300 metra katrorë. Kur pronari ka ndërtuar edhe diçka tjetër në demokraci, fillimisht legalizohet ndërtimi i vjetër dhe më pas pjesa e re e ndërtuar. Oborri duhet të mos jetë pronë shtetërore, siç janë repartet ushtarake, plazhet, institucione etj. ASHK duhet të mbaronte procesin për 6 muaj, por nuk ka mbaruar punë ende. Nuk ka nevojë të bëjë kërkesë qytetari, por e bën ASHK mbi bazë të hartave ose e bën me kërkesë të qytetarëve. Ky ligj duket i mirë, por e ka ngarkuar ASHK që të bëjë gjendjen faktike dhe juridike të pronave. ASHK ju thotë qytetarëve që duhet të sjellësh ti hartën e korrigjuar, duhet të marrësh ti deklarata nga fqinjët. ASHK ndryshe ka kompetenca në ligj e ndryshe vepron. Kush ka prona përpara vitit 1991, të bëjë kërkesë. Nëse kanë prona shtesë, do veprojnë kështu me pronën e vjetër dhe më pas për ndërtimin e ri, duhet që të ndjekin procesin e legalizimit, tha avokati Erald Aga.
