Edhe pse mund të duket e pabesueshme dhe një ngjarje që ndodh vetëm nëpër filma, dy të burgosur në burgun “113” në Tiranë kanë tentuar ditën e sotme të arratisen. Mësohet se ata kanë qenë në zonën e ajrimit, kur dhe kanë tentuar të pargohen nga vendi ku kryejnë dënimin.
Të burgosurit nuk janë dy emra të panjohur, pasi bëhet fjalë për Arbër Çekajn dhe Fatmir Pjetrin.
Nuk dihen ende detaje të mëtejshme rreth ngjarjes në fjalë, ndërsa pritet edhe informacioni zyrtar nga ana e policisë.
Kujtojmë që Arbër Çekaj është dënuar nga drejtësia shqiptare me 14 vite burg për trafikun e 613 kilogramëve kokainë të fshehur në kontejnerët me banane. Ai i ka mohuar vazhdimisht akuzat, duke thënë se operacioni është dekonspiruar me qëllim mbrojtjen e trafikantëve të vërtetë.
Ndërkohë, Fatmir Pjetri njihet si një nga anëtarët e bandës së “Babagjyshëve”. Banda ka kryer një sërë grabitjesh duke përdorur maskime të ndryshme, që nga veshja si policë e deri te veshja si babagjyshë të festës së Vitit të Ri.
Pjetri është dënuar me 30 vjet burg për veprat penale “Vjedhja me armë e kryer në bashkëpunim”, “Grupi i strukturuar kriminal” dhe “Kryerja e veprave penale nga organizata kriminale dhe “Grupi i strukturuar kriminal”.
