Kandidati i Partisë Demokratike për Tiranën, Belind Këlliçi ka folur lidhur me betejën që PD dot të bëjë për të vërtetuar parregullsitë e zgjedhjeve dhe lidhur me liderin e ri të PD. Në një intervistë për Fax News, Këlliçi ka thënë se PD ka dorëzuar një mal me letra, ndërsa institucionet ligjzbatuese janë aty për të zbardhur parregullsitë.
“Kemi dorëzuar një mal me letra. Kemi kërkuar që institucionet të mos flenë gjumë. Kontrollohen nga një individ i vetëm. Edi Rama këtu mbetet vetëm të shpallet zot. Nuk e di për çfarë rri më. Çfarë la pa vjedhur ky, që i duhej një mandat i tretë?! Kemi bërë gjithçka kemi pasur mundësi. Institucionet ligjzbatuese janë aty për të zbardhur. Çfarë kam parë unë me sytë e mi, çfarë kam vuajtur unë në fushatë, nuk ka ambasador që mund të më thotë sesi është realiteti. E di unë sesi është realiteti, jo ata që rrinë në hollet e restoranteve më të shtrenjta të Shqipërisë. E di unë se çfarë është bërë në zonat ku kam qenë”, ka thënë Këlliçi.
I pyetur si duhet të jetë lideri i ri i PD, Këllici tha se ai nuk duhet të ketë asnjë lidhje me të kaluarën komuniste dhe të ketë sa më pak mëkate në kurriz. Ndër të tjera, lideri duhet të jetë i fortë dhe t’i qëndrojë fjalës së tij në mënyrë të padiskutueshme.
“Duhet të jetë patjetër një lider perëndimor. Nuk ka asnjë të përbashkët me të shkuarën komuniste. Një lider që ka sa më pak mëkate në kurriz. Duhet një lider që garon me një ekip. Duhet të jetë disi populist. Duhet të jetë shume i fortë dhe t’i qëndrojë në mënyrë të padiskutueshme fjalës së tij dhe objektivit të vendosur bashkarisht me ekipin e tij”, u shpreh Këlliçi.
