Këtë vit shumë pushues kanë humbur jetën në vendin tonë si pasojë e mbytjes në det. Sezoni turistik në vendin tonë ka nisur prej më shumë dy muajsh, madje edhe fitimet kanë qenë të larta.
Edhe pse vendi ynë po preferohet gjithmonë e më shumë nga të huajt, sërish kanë qenë të pakta masat që janë marrë për të shmangur tragjeditë.
Që në vitin 2016, në bazë të Vendimit të Këshillit të Ministrave, të gjitha subjektet private, sidomos ato që e ushtrojnë aktivitetin e tyre buzë detit, duhet të kenë një kullë vrojtimi të pajisur po ashtu me roje plazhi.
Emisioni investigativ “Fiks Fare”, për të vërtetuar edhe më shumë se sa zbatohet ky ligj, ka dalë në terren në Shëngjin e Golem.
Thuajse të gjitha kullat e vrojtimit kanë qenë bosh, kur këto biznese duhet të detyroheshin nga VKM për ta zbatuar ligjin deri në fund.
Drejtori i Turizmit në Bashkinë Kavajës është shprehur para kamerave se ende nuk kanë marrë masa për subjektet që nuk e kanë zbatuar këtë ligj.
Ai ka treguar se i kanë këshilluar e paralajmëruar këto biznese se masa të ashpra do të ndërmerren, por ende nuk është ndëshkuar asnjë subjekt.
Edhe administratori i Njësisë Administrative Shëngjin, Gjok Deda është shprehur se kanë bërë kontrolle dhe se nuk do të tolerojnë askënd që do të shkelë ligjin.
Mungesa e rojeve bregdetare ka sjellë edhe reagimin e Ministrit Blendi Klosi. Ky i fundit ka ngarkuar me përgjegjësi bizneset dhe pushtetn vendor për mosrespektimin e ligjit. Klosi është shprehur se para pushuesve janë kokëulur, po për këdo që nuk zbaton VKM-në do të merren masa shumë të ashpra.
