Seanca e gjyqit kundër ish-ministrit të Mbrojtjes, Fatmir Mediu, për çështjen e “Gërdecit”, është shtyrë. Sot pritej të merreshin në pyetje pesë ekspertë, por seanca nuk ka vijuar siç ishte parashikuar.
Fatmir Mediu akuzon prokurorinë për mungesë transparence dhe për ndërtimin e akuzës në mënyrë të paqartë. “Prokuroria ka ndërtuar akuzën dhe duhet të thotë aktet që janë bërë në 2008-2009 me një grup të akuzuarish, 24 prej të cilëve janë të dënuar. Duhet të thotë ku janë përgjegjësitë e ministrit. Prokurori siç e tha në fund, këto janë tre elementë që duhen shqyrtuar. Të thotë edhe aktet me të cilat ka vepruar ministri që kanë ardhur këto dëme sipas supozimit të prokurorisë. Kjo është barazia e palëve në proces,” deklaroi Mediu.
Avokati i Mediut, Ardian Vishaj, shprehu shqetësimet e tij për mënyrën se si po zhvillohet procesi. “Mbi aktet dhe ekspertizat ne kemi pyetje, sesi ekspertët janë emëruar. Na intereson se cili ekspert ka shkruar këtë pjesë të aktit dhe duam të shprehim kritikat tona për aktet, pasi ka një sërë shkeljesh. Në pyetjet tona, gjykata ndërhynte për t’i ndaluar. Ndërsa, sa herë që ndërhynte Prokuroria, gjykata dëgjonte. Standardi i dyfishtë i drejtësisë është padyshim për revoltë, sepse nuk ndihmon të vërtetën e gjësë. Të paktën ajo që është e drejtë e jona, të realizohet,” tha Vishaj.
Ngjarja e vitit 2008, që çoi në shpërthimin e një depoje ushtarake në Gërdec, shkaktoi humbjen e shumë jetëve dhe dëme të mëdha materiale.
