Sërish është shtyrë seanca paraprake në Gjykatën e Posaçme kundër Korrupsionit dhe Krimit të Organizuar ndaj kreut të Partisë Demokratike, Sali Berisha.
Në seancën e parashikuar për sot pritej të vendosej nëse çështja do të kalonte për gjykim apo jo, por procesi është shtyrë për në datën 11 prill 2025, në orën 10:00.
Sipas një deklarate për mediat, avokati i Berishës, Genc Gjokutaj, bëri me dije se arsyeja e shtyrjes ishte mungesa e njërit prej avokatëve për arsye shëndetësore.
Ai shtoi se gjatë seancës, Prokuroria paraqiti kontestimet e saj ndaj argumenteve të mbrojtjes, ndërsa theksoi se, sipas tij, mungon një fakt penal që të justifikojë vijimin e hetimeve, duke kërkuar pushimin e çështjes.
Berisha është marrë i pandehur për korrupsion pasiv, me akuzën se ka ndërmarrë veprime konkrete në miratimin e ligjeve dhe akteve nënligjore në favor të pesë familjeve pronare të truallit të kompleksit sportiv “Partizani”, ku përfitues rezulton edhe dhëndri i tij, Jamarbër Malltezi.
Malltezi, nga ana tjetër, akuzohet për korrupsion pasiv në bashkëpunim me Berishën, si dhe për pastrim parash.
Sipas Prokurorisë, ai ka përfituar në mënyrë të paligjshme miliona euro nga privatizimi i kompleksit, përmes ndikimit të padrejtë dhe shfrytëzimit të pushtetit.