Është shtyrë seanca paraprake për dosjen “Toyota Yaris”, në të cilën akuzohet edhe ish-kryeprokurori Aurel Zarka. Shkak për shtyrjen u bë moslegjitimimi i palëve, pasi Gjykata e Posaçme kërkoi që avokatët e personave në kërkim të paraqesin procura të firmosura nga vetë të akuzuarit.
Edhe Zarka, i vetmi i arrestuar në këtë çështje, nuk ishte i pranishëm, por u përfaqësua nga avokatët e tij. Seanca e ardhshme është caktuar për më 20 shkurt, ku gjyqtarët do të vendosin nëse dosja do të kalojë në gjykim.
Aktualisht, çështja është në fazën paraprake dhe po shqyrtohet nga gjyqtari Erion Çela, pas dorëheqjes së Irena Gjokës për shkak të konfliktit të interesit. Ajo kishte qenë pjesë e trupës gjykuese në çështjen e sekuestros së dy makinave të Suel Çelës në kuadër të operacionit “Forca e Ligjit”.
Në kërkim për këtë dosje janë ish-agjentja e BKH-së, Erjona Daupaj, Astrit Vladi dhe avokati Radovan Çela. Prokurorët Klodian Braho dhe Altin Dumani kanë ndarë dosjen në fraksione të tjera dhe vijojnë hetimet për individë të tjerë të përfshirë.
