Ditën e sotme është zhvilluar një tjetër seancë gjyqësore në Gjykatën e Posaçme lidhur me çështjen “Partizani”, ku të pandehur janë ish-kryeministri Sali Berisha dhe dhëndri i tij, Jamarbër Malltezi.
Seanca u shty për në datën 15 shtator, për shkak të kërkesave të paraqitura nga mbrojtja.
Avokati i Berishës, Genci Gjokutaj, kërkoi përjashtimin e trupës gjykuese, duke argumentuar se gjyqtarët ndodhen nën presionin dhe vëzhgimin e SPAK, çka sipas tij, cenon paanshmërinë e procesit. Mbrojtja kërkoi gjithashtu që gjykimi të mos zhvillohet nga një trupë e posaçme, por nga gjyqtarë të zakonshëm.
Berisha dhe Malltezi përballen me akuza për korrupsion dhe pastrim parash, në lidhje me privatizimin e kompleksit “Partizani”.
Seanca e parë, e caktuar më 30 qershor, u shty për shkak të mungesës së Berishës, i cili deklaroi se nuk kishte marrë fletëthirrjen, si dhe për shkak të mungesës së një tjetër të pandehuri, biznesmenit Fatmir Bektashi, për arsye shëndetësore.
