Mbledhja e radhës e Komisionit Hetimor për shkarkimin e presidentit Ilir Meta është shoqëruar me debate të forta mes deputetëve.
Me 7 vota pro dhe 2 kundër, Komisioni vendosë të shtyjë me dy muaj punimet, shkruan “Faxweb”.
Deputeti Adriatik Alimadhi ka kërkuar paraqitje përpara Komisionit, të të gjithë drejtuesve të institucioneve, që kanë anuluar dekretin e presidentit.
Sipas tij, nuk ka një shkelje të rëndë nga presidenti dhe ngritja e këtij organi privon lirinë dhe të drejtat e kreut të shtetit.
“Do të kërkoja që të paraqiteshin përpara këtij komisioni të gjithë drejtuesit e institucionet që kanë anuluar dekretin e presidentit. Ngritja e këtij komisioni i privon lirinë dhe të drejtat presidentit. Kam kërkuar të shtyhet afati i këtij komisioni. Ky komision nuk duhet të ekzistojë sepse nuk kemi një shkelje të rëndë. Presidenti nuk ka bërë ndonjë marrëveshje qe prek interesat e ketij vendit”, u shpreh Alimadhi.
Ndërkohë drejtuesi i punimeve, deputeti socialist, Ulsi Manja, u shpreh se Komisioni do të presë përgjigjen e delegacionit të Venecias, i cili ka përcaktuar si afat datën 11 tetor.
Për këtë arsye shtoi ai, lind nevoja për t’ju drejtuar kuvendit për të shtyrë afatin.
Kujtojmë këtu se Komisioni Hetimor kishte si afat datën 8 tetor, mirëpo shkak për shtyrjen është bërë përgjigja e Komisionit të Venecias, e cila do të vijë më 11 tetor.
