Dita e Verës ka bërë që dhe pse në kushte pandemie shumë qytetarë pavarësisht kufizimeve të dalin të festojnë. Policia ka paralajmëruar se masat janë shtrënguar për të shmangur grumbullimet mbi 10 persona për këtë ditë feste.
Është lajmëruar se do të ketë shtim patrullash për monitorimin e situatës në territor, për të mos lejuar organizimin e grumbullimeve në vende të mbyllura dhe të hapura, gjatë ditës së sotme dhe gjatë të hënës që është pushim zyrtar. Po kështu do të monitorohet mbajtja e detyruar e barrierës mbrojtëse (maskës) nga të gjithë qytetarët, gjatë qëndrimit apo lëvizjes në ambientet jashtë shtëpisë.
Nga policia do të shtohen kontrollet në ambientet e lokaleve, bareve, restoranteve, duke njoftuar pronarët dhe administratorët për të mos organizuar apo lejuar grumbullime masive të qytetarëve gjatë Ditës së Verës.
Policia parashikon ndërhyrjen për ndalimin e grumbullimeve më shumë se 10 persona në vende të mbyllura apo të hapura, për festime. Do të ndalohet lëvizja e qytetarëve përtej orarit të lejuar si dhe aktiviteti i bareve dhe restoranteve përtej orës 20:00.
Vlen të theksojmë se kjo është hera e dytë që “Dita e Verës” festohen në kushte pandemie, kësaj here dhe në rekorde vdekjesh.
Në shumë qytete janë zbukuruar qendrat e qyteteve, por nuk po lejohet grumbullime dhe festime nga qytetarët.
