Evangjeli Veli është peshengritësja medaliste e kampionatit Europian që do garojë në Botëror që po mbahet në Uzbekistan.
Por përtej fakti se ajo mund të na sjellë një tjetër medalje që do të bëjë krenarë shqiptarët, vlen të përmendet se ende nuk ka marrë shpërblimin nga shteti. Në këtë kampionat Botëror, edhe pse është medaliste e kampionatit Europian, Veli shkon e zhgënjyer nga shteti.
Veli shprehet se përveç pjesën financiare që i duhet më patjetër, pasi po kërkon ende para nga prindërit për të ushtruar profesionin e saj, shpërblimi do ishte edhe një vlerësim për të.
“Ashtu siç më takon me ligj prisja të kisha një shpërblim si medaliste e kampionatit europian, por nuk erdhi kurrë. Ose të paktën nuk ka ardhur deri më sot. Përveç parave do ishte edhe vlerësim. Për të mos thënë se më duhet të kërkoj ende nga prindërit për të bërë sport,”-tha Evangjeli Veli.
Veli do të garojë në orët e para të mëngjesit së ditës së enjte, ndërsa peshëngritësit e tjerë të ekipit kombëtar janë Briken Calja, Erkand Qerimaj, Daniel Godelli dhe Krenar Shoraj.
Kujtojmë që peshëngritësja shqiptare, Evangjeli Veli zhvilloi një paraqitje historike në Kampionatin Evropian që u zhvillua në Rusi, duke “rrëmbyer” vendin e tretë.
Sportistja shqiptare mori medalje bronzi në stilin e shkëputjes. Veli ngriti 89 kg në tre prova që zhvilloi. Në shtytje Veli u rendit e teta me 105 kg.
Po përtej faktit që akoma nuk ka marrë shpërblim nga shteti, peshëngritësja që garon në kategorinë 55 kilogramë, pretendon se do të bëjë krenarë shqiptarët.
“Jam sëtrvitur aq shumë saqë medalja është diçka që mund ta arrij dhe do ta arrij me sezbën,”- u shpreh Evangjeli Veli.
Problematika me shpërblimet është ngritur dhe më përpara nga sportistë të tjerë të cilët pretendojnë që qeveria e vendit që kanë përfaqësuar në kompeticione të rëndësishmë sportive nuk iu ka dhënë atyre një shumë dinjitoze të cilën e meritojnë.
Ndërkohë që para 3 viteve qeveria “hapi thesin”, duke miratuar një vendim të posaçëm për trajtimin e sportistëve që thyejnë rekorde në kompeticionet ndërkombëtare.
Vendimi i qeverisë përcaktonte 7 kategori sportistësh të cilët marrin shpërblime financiare në rast se do të fitojnë kupa apo trofe për Shqipërinë.
Sportistët shqiptarë që arrijnë rezultate të larta në kompeticionet kombëtare apo ndërkombëtare dhe që konsiderohen sportistë të nivelit të lartë do të trajtoheshin në mënyrë të veçantë dhe do të shpërbleheshin nga qeveria.
Sipas vendimit, sportistët gëzojnë statusin e sportistit të nivelit të lartë nga momenti i marrjes së rezultatit zyrtar në veprimtaritë ndërkombëtare apo kombëtare, deri në marrjen zyrtare të të njëjtit rezultat nga një sportist tjetër pasardhës.
Në rastin konkret sportistja shqiptare Evangjeli Veli plotëson një nga pikat e vendimit “vendi i parë deri në vendin e tretë në kampionate evropiane” dhe si rrjedhojë duhet të konsideoret sportiste e nivelit të lartë dhe të marrë shpërblimin që i takon.
