Një shqiptar i arrestuar në Francë, është gjetur i pajetë në dhomën e qelisë.
Autoritetet franceze e kanë raportuar ngjarjen si vetëvrasje.
Nëna e Mentor Rexhës, Rukije Rexha, i ka bërë thirrje shtetit shqiptar që të zbardhë ngjarjen.
Sipas saj, djali nuk ka kryer vetëvrasje, por e kanë dhunuar në burg, shkruan “Top Channel”.
Ajo tregon se i biri ka shenja dhune në trup, për këtë arsye kërkon hetim.
“I bëj thirrje shtetit shqiptar që ta zbardh ketë ngjarje, djali nuk ka kryer vetëvrasje por është dhunuar ne burg. Lajmin e kemi marre nga shokët e tij qe na kane tregua sepse askush tjetër nuk na ka lajmëruar për vdekjen e djalit. Djali kishte një vit që ishte në France dhe 6 muaj kishte në burg se akuzohej për djegien e disa makinave. Ka qenë duke folur me vëllain në telefon kur e kanë arrestuar. Gjate kohës që kemi folur në telefon nuk na ka shprehur shqetësime dhe ne jemi të bindur se nuk ka kryer vetëvrasje. Kërkojmë që të hetohet sepse në trup ka shenja dhune. I bëj thirrje shtetit të me kthejnë trupin e djalit dhe të zbardhet ngjarja. Fëmijët i kam rritur me halle” thotë ajo.
Ndërkohë Selaudin Rexha, djali i xhaxhait të viktimës, ka akuzuar ambasadën shqiptare në Francë, e cila sipas tij i është përgjigjur në mënyrë absurde kur i kanë kërkuar ndihmë.
“Ambasada shqiptare në France nuk na është përgjigjur por na është shprehur në mënyre absurde kur i kemi kërkuar ndihme dhe te gjitha veprimet janë duke i kryer vëllai i viktimës me të motrën e tij. Akuzat ndaj kushëririt tim janë të pavërteta. Ky është rasti i 5 i shqiptarëve që vriten në burg dhe dy janë nga Shkodra ndërkohë që shtetit nuk hesht ndërkohë që po te ishin nga ndonjë shtet tjetër reagimi do ishte i madh”, shprehet ai.
Mentor Rexha ka lindur në Lezhë dhe banonte në Shkodër.
Një vit më parë ai kishte udhëtuar drejt Franës si emigrant, ndërsa kishte bërë edhe aplikimin për të marrë statusin e azilantit.
Ai ka përfunduar në burg së bashku me dy shqiptarë të tjerë nën akuzën e djegies së disa automjeteve.
Motra e tij thotë, se në komunikimet që kanë pasur, Rexha ka pretenduar gjithmonë pafajësinë.
Jo të bindur nga versioni i autoriteteve franceze, familjarët e Rexhës i kanë bërë fotot trupit të tij, ku shihen shenjat e dhunës, si litari në fyt, të çarat në kokë dhe shenja të shumta në trup.
