Rreth 7700 shqiptarë që ndodheshin në vendet e Bashkimit Europian janë urdhëruar të largohen drejt vendeve të treta. Ky është raporti i fundit sipas të dhënave të marra nga EUROSTAT, i cili bazohet në 3-mujorin e dytë të vitit. Ky numër përbën një përqindje të konsiderueshme, duke e renditur Shqipërinë në vendin e dytë pas Gjeorgjisë, e cila përbënte 10% të totalit. Në total, rreth 96 mijë qytetarë janë urdhëruar të largohen nga vendet e BE-së gjatë këtij tremujori.
Duke parë të dhënat kombëtare, numri më i lartë i qytetarëve, që nuk janë nga vende të bashkimit europian, të urdhëruar të largohen nga territori i një vendi të BE-së, u regjistrua në Francë me 31 mijë e më pas renditet Gjermania me rreth 13 mijë. Nga ana tjetër Franca, Gjermania dhe Suedia regjistruan numrin më të lartë të njerëzve të rikthyer në vendet e treta.
Mes qytetarëve jo-europianë të urdhëruar të largohen nga territori i një vendi të BE-së gjatë kësaj periudhe, qytetarët algjerianë dhe marokenë kishin pjesën më të madhe (nga 7% secili), të ndjekur nga turqit dhe sirianët (nga 6% secili). Referuar të dhënave nga Instituti i Statistikave, numri i largimeve nga vendi vazhdon të regjistrojë një rritje të qëndrueshme krahasuar me periudhat e kaluara.
Kjo rritje sjell me vete problematika të ndryshme, si plakja e popullsisë dhe mungesa e profesionistëve në tregun e punës. Kjo e fundit duket sikur tashmë është kthyer në një problem jetik për bizneset, që vuajnë mungesën e krahut të punës. Edhe pse shpesh herë, shumë biznesmen janë mundur që të sjellin punëtorë nga vendet e Afrikës apo Azisë, sërish ata nuk kanë mundur që të plotësojnë nevojat e tyre.
Ndërkohë, nga ana tjetër, të rinjtë dhe forca kryesore e krahut të punës, po largohet nga Shqipëria, por duke mos u pranuar edhe në vendet ku ata kërkojnë që të emigrojnë
