Mossos d’Esquadra në Spanjë kanë kryer një operacion të madh policor kundër trafikut të marijuanës, pastrimit të parave dhe mbajtjes së armëve.
Rreth 500 policë katalanas u angazhuan në provincat e Barcelonës dhe Tarragona, duke kryer 30 kontrolle, gjatë të cilave u arrestuan 22 persona.
Ky aksion u bazua në një hetim të mëparshëm antidrogë që zbuloi një rrjet të fuqishëm pastrimi parash, duke përdorur sistemin e transaksioneve të paligjshme të njohur si “hawala” ose “fei chien.”
Operacioni i koduar “Doulu” filloi me bastisje në disa zona të Barcelonës, rrethinën e saj dhe Tarragona, duke u koordinuar nga njësia e krimeve ekonomike në bashkëpunim me Europolin.
Hetimi zbuloi një rrjet financiar që mbështeste organizata kriminale me bazë në Itali dhe lidhje në Spanjë.
Grupi ishte i përfshirë në trafikimin e 30 tonëve hashash dhe marijuanë, duke gjeneruar rreth 26 milionë euro në vit.
Shumica e të arrestuarve ishin me origjinë shqiptare dhe kineze.
Gjatë bastisjeve, autoritetet sekuestruan 4 milionë euro në para cash, një nga sasinë më të mëdha të kapura në historinë e Mossos d’Esquadra.
Ky operacion pasoi një hetim të vitit të kaluar, që zbuloi funksionimin e një sistemi të fshehtë bankar, të njohur si “fei chien” ose “paratë që fluturojnë,” i cili mundësonte transaksione financiare pa lëvizje fizike të parave.
Ky sistem përdorej për të financuar grupe kriminale në Evropë, duke marrë një komision nga 1.5% deri në 2%.
Gjatë fazës së parë të këtij hetimi, 70 persona u arrestuan: 50 në Itali dhe 20 në Spanjë.
