Shpenzimet e shqiptarëve për veshje janë rritur me ritmin më të ulët krahasuar me 12 kategoritë kryesore të konsumit në periudhën 1995-2023, duke treguar një sjellje të matur dhe të kursyer ndaj këtij zëri. Të dhënat zyrtare të INSTAT tregojnë se në vitin 1995 familjet shqiptare shpenzuan 11,2 miliardë lekë për veshje, ndërsa në vitin 2023 kjo shumë arriti në mbi 43 miliardë lekë.
Në termat realë, pra pa përfshirë efektin e inflacionit, shpenzimet për veshje janë rritur me 285% në 28 vite. Kjo është rritja më e ngadaltë mes të gjitha kategorive të konsumit, duke reflektuar një qëndrim të kujdesshëm të qytetarëve ndaj këtij zëri.
Rritja më e ndjeshme e shpenzimeve për veshje është shënuar në vitet 2007-2008, ndërsa dekada e fundit ka shënuar stagnim, kur merret parasysh ndikimi i inflacionit. Ndër faktorët që kanë ndikuar në këtë qëndrim janë ndryshimet demografike. Ulja e numrit të fëmijëve, të cilët janë konsumatorët kryesorë të veshjeve, ka çuar në ulje të kërkesës. Në të njëjtën kohë, rritja e popullsisë në moshë pensioni ka zhvendosur fokusin e konsumit drejt medikamenteve dhe shpenzimeve shëndetësore.
Inflacioni i lartë i dy viteve të fundit ka intensifikuar këtë prirje. Qytetarët shqiptarë po shmangin blerjet e veshjeve të reja dhe po orientojnë shpenzimet drejt artikujve të përdorur. Sipas të dhënave të tregtisë së jashtme, në vitin 2024 importet e tekstileve dhe këpucëve ranë me 8.6%, ndërsa importet e veshjeve të përdorura u rritën me 4.7%, duke arritur një vlerë mbi 38 milionë euro.
Kjo është hera e dytë radhazi që importet e veshjeve dhe këpucëve shënojnë rënie, pas një tkurrjeje prej 4.2% edhe në vitin 2023. Në të kundërt, tregu i veshjeve të përdorura vazhdon të zgjerohet, duke reflektuar një prirje të qartë të konsumatorëve drejt alternativave më të përballueshme.
Sipas Barometrit të Ballkanit, një anketë e realizuar nga Këshilli i Bashkëpunimit Rajonal, shqetësimi kryesor i qytetarëve shqiptarë për vitin 2024 është pikërisht inflacioni. Pas fillimit të luftës në Ukrainë, çmimet e produkteve bazë në Shqipëri kanë pësuar rritje të ndjeshme, duke detyruar qytetarët të shkurtojnë shpenzimet për mallra jo të domosdoshme, siç janë veshjet dhe këpucët. Kjo tendencë ndjek të njëjtën linjë me vendet e tjera të Europës.
