Teksa këtë të hënë filloi censi i popullsisë dhe banesave gazetari Mentor Kikia ka bërë një analizë të ndryshmeve demokrafike që kanë ndodhur në vendin tonë, sidomos viteve të fundit. Gazetari vë në dukje ulje të numrit të popullsisë dhe lindjeve, si dhe një rritje të moshës mesatare. Duke ironizuar për rënien e lindjeve Kikia shprehet: Raporti lindje-vdekje, është përmbysur në favor të vdekjeve. Sipas Kikisë Shqipëria renditet e treta në botë për diasporën më të madhe.
Nga Mentor Kikia
Sot filloi Censusi i radhës, i popullisë dhe banesave.
Besohet(shifra është e INSTAT, por pranohet si jo shumë e saktë) se më 1 janar 2022 popullsia e Shqipërisë(rezidente) ishte 2.7 milionë banorë. 1,3% më pak se në vitin 2021.
Mosha mesatare ishte 28 vjeç në vitin 1990, 33 vjeç në vitin 2011, dhe afro 40 vjeç në 2022. Nga vendi largohen mesatarisht 40-45 mijë njerëz në vit, kryesisht të rinj.
Raporti lindje-vdekje, është përmbysur në favor të vdekjeve.
Në Shqipëri ka rreth 700.000 pensionistë, pra afërisht 1/4 e popullisë janë të moshuar. Një shoqëri e vjetër, është një shoqëri pa ambicie, pa fuqi punëtore dhe me konsum të ulët.
Shqipëria renditet e treta në botë për diasporën më të madhe. Në vend të parë është Guyana(36.4%), një popull i mjeruar edhe pse një vend i pasur, në Amerikën e Jugut. Në vend të dytë Bosnja(34%), e masakruar nga serbët dhe ende e përçarë e jo e stabilizuar, dhe në vend të tretë Shqipëria(30,7%).
Parashikimet janë gjithashtu fataliste. Sipas OKB-së, deri në 2050 Shqipëria mund të humbë sërish popullsi dhe të zbresë nën 2.5 milionë banorë. Ndërsa deri në fund të shekullit, pra në 2100, në Shqipëri mund të ketë 1.1 milionë banorë, ose në rastin më të keq, rreth 860 mijë banorë. Deri në fund të shekullit mund të duket një kohë e largët, por në historinë e një kombi 75 vjet janë një fragment sekonde.
Qeveria këtë situatë e quan normalitet, lëvizje sipas tregut të punës. Ndërsa disa analistë nuk e shikojnë si tragjizëm, por thjeshtë një ikje e përkohshme e njerëzve. Partia në pushtet duket e kanaqur, pasi ajo e “menaxhon” më lehtë politikisht një popullsi të vogël.
Në 2021, në Shqipëri votuan 1.6 milionë njerëz. 45% e tyre janë pensionistë që shpërblehen rregullisht 1 muaj para zgjedhjeve, dhe rreth 20% e pjesës së mbetur janë punonjës të administratës.
Opozita e përdor thjeshtë si argument për luftë politike, por ajo ka kontributin e saj në prodhimin e këtij mjedisi depresiv.
Duke ikur, ne u bëjmë një nder të madh atyre që kanë vrarë shpresën. Ndryshimi nuk do të vijë kurrë nga pensionistët, as nga ata që rreshtohen të bëjnë “like” postimet e drejtorëve.
