Shqipëria do të ndihmojë sërish Italinë, pas ndihmës me 30 mjekë e infermierë, e cila bëri shumë bujë përtej Adriatikut.
Sipas “Report Tv”, një grup tjetër me 60 infermierë, pritet të niset drejt Italisë, për të kontribuar në emergjencën mjekësore të krijuar për shkak të pandemisë COVID-19.
Njëra prej infermiereve që do të niset drejt Italisë është edhe Manjola Rama.
Ajo shprehet se me vendimin e saj i ka mërzitur shumë familjarët, në veçanti 3 fëmijët e vegjël që ka në shtëpi.
Manjola ndërkohë para dy muajsh ka qenë zëvendës infermiere në QSUT, ndërsa është njoftuar 2 javë më parë për misionin drejt Italisë.
“Ne sot jemi mbledhur për një si ndihmë kundrejt shtetit italian. Jemi rreth 60 infermier, jo të gjithë të punësuar. Unë kam qenë zëvendësuese në QSUT, deri sa të presim radhën vendosëm që të ndihmojmë Italinë. Na njoftuan dy javë më parë. E dimë që do kemi viruse dhe në do të japim maksimumin si staf që jemi, dhe besoj që do dalim faqebardhë. Unë jam nënë me tre fëmijë, janë mërzitur. Nuk kemi bërë trajnim, por unë që kam punuar, e di si është puna, trajnimi, na kanë thënë që do trajnohemi atje dhe pastaj do fillojmë punë. Janë nga gjithë Shqipëria. Ne do të shkojmë në Romë, por spitalin e vendosin ato. Mesazhi është për të gjithë që të mbajnë distancë, rregullat e higjienës dhe do të dalim faqebardhë”, tha infermierja.
Aktualisht numri i të prekurve nga COVID-19 në Itali është 178.972 raste, midis të cilëve 47.055 të shëruar dhe 23.660 viktima.
