Presidenti Donald Trump është pyetur nga gazetarët në Shtëpinë e Bardhë pas takimit me mbretin e Jordanisë lidhur me planin për shpërnguljen e palestinezëve nga Gaza.
I pyetur nëse janë përfshirë shtete të tjera për të vendosur palestinezët e Gazës, përveç Jordanisë dhe Egjiptit, përfshirë Shqipërinë dhe Indonezinë, Trump u përgjigj: “Po, sigurisht”.
Ai shtoi se ka pasur shumë shtete të tjera të gatshme të përfshihen dhe theksoi se shumë njerëz, përfshirë mbretin e Jordanisë, duan të ndihmojnë në strehimin e palestinezëve.
Mbreti i Jordanisë pas kësaj deklarate tha se ka dijeni se edhe vendet evropiane janë të interesuara të përfshihen në këtë operacion.
Pjesë nga konferenca për shtyp në Shtëpinë e Bardhë:
Pyetje: A po merrni në konsideratë vende të tjera për të dërguar palestinezët, si Shqipëria apo Indonezia, përveç Egjiptit dhe Jordanisë?
Donald Trump: Po, sigurisht. Ka shumë shtete që duan të përfshihen. Ka shumë njerëz që janë të gatshëm të ndihmojnë palestinezët. Ka shtete të mira, udhëheqës me zemra të mëdha dhe ky zotëria këtu është në krye të listës.
Pyetje: Nëse ata nuk duan të ikin, si do t’i detyroni, Zoti President?
Donald Trump: Ata do të jenë shumë të lumtur.
Pyetje: Madhëria juaj, a duhet të presim që Jordania të japë një përgjigje të përbashkët nga vendet arabe?
Mbreti Abdullah i Jordanisë: Përgjigja do të vijë nga shumë vende, arabe dhe ndërkombëtare. Di që evropianët duan të përfshihen.
