Kryeministri Edi Rama ka thënë në Asamblenë e Kombeve të Bashkuara se Shqipëria ka kohë që është gati për integrimin në Bashkimin Europian dhe e pret me padurim një proces të tillë. Ai tha se pret që BE të bëjë pjesën e saj, ndërsa e cilësoi integrimin një aspiratë mbarë rajonale dhe burim frymëzimi.
Rama përmendi edhe nismën e “Ballkanit të Hapur” mes vendeve të rajonit, duke thënë se është shenja dhe prova ka rajoni për rritjen e punësimit dhe tregtisë e gjithashtu për të ndihmuar në zgjidhjen e konflikteve njëherë e përgjithmonë.
“Procesi i integrimit europian përfaqëson një spirancë për ne. Ne presim me padurim dhe e kam thënë në Tiranë dhe Bruksel se Shqipëria ka kohë që është gati dhe pret që BE të bëjë pjesën e saj. Integrimi është një aspiratë mbarë rajonale dhe burim frymëzimi në një rajon të transformuar me të 6-ta vendet e rajonit që kanë rënë dakort të hyjnë në një treg të përbashkët bazuar në standartet e BE-së. Ballkani i Hapur është shenja dhe prova që kemi ne si rajon për rritjen e punësimit, tregtisë dhe të ndihmojë në zgjidhjen e konflikteve njëherë e përgjithmonë”, ka thënë Rama gjatë fjalës së tij.
