Familjes së futbollistit ekuadorian Jackson Rodriguez i janë dashur dy ditë për të shpëtuar nga duart e bandave kriminale që i kishin marrë peng.
Policia e Ekuadorit ka publikuar pamjet e operacionit ku u shpëtuan bashkëshortja dhe djali i futbollistit, të cilët ishin rrëmbyer dhe mbaheshin peng kundrejt një shume parash, të cilat autorët nuk arritën t’i përfitonin.
Sot, 26-vjeçari është sërish pranë familjes së tij, pas një makthi që zgjati afro tre ditë, falë ndërhyrjes së suksesshme të policisë.
Sipas autoriteteve, ngjarja ndodhi kur disa persona të armatosur dhe të maskuar, pjesëtarë të bandave kriminale, hynë në banesën e Rodriguez, ku ai ndodhej bashkë me bashkëshorten dhe djalin.
Autorët rrëmbyen gruan dhe fëmijën, ndërsa vetë futbollisti arriti të fshihej poshtë shtratit për t’i shpëtuar kapjes. Përveç pengmarrjes, grabitësit morën edhe sende me vlerë dhe para që ndodheshin në banesë.
Menjëherë pas ngjarjes, Rodriguez njoftoi policinë, ndërsa lajmi mori përmasa të mëdha në mediat vendase.
Pas një operacioni të shpejtë dhe të koordinuar, policia arriti të identifikojë vendndodhjen dhe të shpëtojë pengjet, të cilët fatmirësisht ndodhen në gjendje të mirë shëndetësore.
