Një shpërthim me tritol ka ndodhur mbrëmjen e djeshme në Tiranë, pranë hotelit të babait të Ervin Matës, biznesmenit Luan Mata.
Sipas njoftimit të policisë, lënda plasëse ka shpërthyer mes godinës së hotelit “Victoria”, dhe një lokali që ndodhet aty pranë.
Pista kryesore e hetimeve mbetet biznesi i Matës, por nuk përjashtohet as pista e një konflikti të pronarit të një lokali bar-kafe, ngjitur me hotel “Victoria”, në pronësi të një personi të identifikuar si K. Gozhita.
Sipas “AbcNews”, pronarët e dy bizneseve janë marrë në pyetje nga policia dhe rezulton se Gozhita nuk ka patur konflikte të mëparshme me persona të tjerë dhe rezulton pa precedent penal.
Duke marrë shkas nga precedetë të mëparshëm të Ervin Matës, policia dyshon se bëhet fjalë për një mesazh kërcënues për këtë person.
Deri tani kamerat e sigurisë të sekuestruara kanë zbuluar një automjet, targa e të cilit po verifikohet nga ana e policisë.
I pyetur nga policia babai i Ervin Matës, Luan Mata, është shprehur se nuk ka pasur konflikte të mëparshme.
Kujtojmë se biznesmeni Ervin Mata u vetëdorëzua në Polici më 2 Mars 2019 pasi prej 6 muajsh kërkohej nga autoritet për vrasjen që ndodhi në zonën e ish-Bllokut, ku pas një përplasje me armë mbeti i vrarë Fabjol Gaxha dhe u plagosën dy të tjerë, Ervis Martinaj dhe Eljon Hato.
Mata në dëshminë e tij në polici mohoi të ketë qëlluar me armë.
Ndërsa fshehjen për gati 6 muaj, e argumentoi me faktin se ishte larguar pasi ishte i frikësuar.
Mësohet se lokali afër hotelit të Matës, ishte në pronësi të shtetasit Klevis Gozhita.
Ndërsa sipas informacioneve të siguruara nga “Report Tv” mësohet se në rrugicën ku ndodhi shpërthimi me tritol, në cepin anësor të hotelit “Victoria” që e zotëron familja e Ervin Matës, nga hyrja e rrugës kryesore, autorët shkuan me makinë, nuk zbritën, por nga dritarja e saj hodhën tritolin, i cili shpërtheu pas 4 minutash.
