Një shpërthim me lëndë plasëse ka ndodhur pas mesnate në zonën e Bregut të Lumit në Tiranë. Ngjarja është regjistruar rreth orës 00:35, pranë një restoranti dhe në derën e banesës së Tonin Qafës.
Si pasojë e shpërthimit janë shkaktuar dëme materiale, duke përfshirë dëmtimin e portës së shtëpisë, xhamave dhe disa mjeteve të parkuara aty pranë. Fatmirësisht, nuk ka pasur të lënduar në njerëz.
Sipas burimeve hetimore, shënjestër e sulmit dyshohet të ketë qenë Tonin Qafa, i cili ka jetuar për shumë vite në SHBA dhe është kthyer në Shqipëri vetëm tre muaj më parë.
Në vitin 2009, ai humbi vëllain, i cili u vra në rrethana tragjike, çka më pas e detyroi familjen e tij të shpërngulej jashtë vendit.
Hetimet po përqendrohen në konfliktet që mund të lidhen me djalin e Tonin Qafës, i cili jeton jashtë vendit.
Policia po shqyrton edhe mundësinë që përplasjet e tij të kenë sjellë këtë sulm ndaj familjes.
Gjithashtu, një tjetër pistë hetimi është ajo e përfshirjes së nipave dhe fëmijëve të tij në aktivitete të dyshimta, përfshirë trafikimin e lëndëve narkotike.
Policia po vijon kërkimet dhe ka sekuestruar pamjet e kamerave të sigurisë në zonë për të identifikuar autorët e mundshëm të sulmit.