Policia e Fierit ka arrestuar një 37-vjeçar, i cili u kap me qindra doza kanabisi dhe shuma të mëdha parash, që dyshohet se janë përfituar nga veprimtaria e tij kriminale.
Ndërkohë, babai i tij është shpallur në kërkim nga autoritetet.
Gjatë kontrollit fizik dhe të automjetit që drejtohej nga ky person, Policia zbuloi doza të lëndës së dyshuar narkotike, cannabis sativa.
Në vijim, gjatë kontrollit në banesë, u gjetën sasi të konsiderueshme cannabis sativa, të ndara në qindra doza gati për shitje, 12 fishekë për armë gjahu, si dhe 3 gërshërë të përdorura për ndarjen e lëndës narkotike.
Policia sekuestroi gjithashtu një shumë parash prej 2 milionë lekësh dhe 700 euro, së bashku me 5 celularë.
Të gjitha këto u morën si prova materiale, ndërsa materialet procedurale iu dorëzuan Prokurorisë për hetime të mëtejshme.
Specialistët për Hetimin e Narkotikëve të DVP Fier, në kuadër të kontrolleve për parandalimin e shitjes së lëndëve narkotike, në bashkëpunim me shërbimet e Forcës së Posaçme Shqiponja, pas një pune të mirëfilltë policore kanë finalizuar operacionin policor të koduar “Peshtani”. Për këtë rast u arrestua shtetasi J(E). M., 37 vjeç, banues në fshatin Peshtan Bregas, Fier, ndërsa u shpall në kërkim shtetasi D. M., 61 vjeç, babai i tij.
