Shpend Ahmeti është një nga figurat më të njohura që janë larguar nga Lëvizja Vetëvendosje. Kryetari i Komunës së Prishtinës u shkëput nga LVV në vitin 2018 dhe që atëherë nuk i ka ndalur kritikat. Këtë herë, i ftuar në televizionin Klan Kosova ai ka thënë se Vetëvendosje nuk duhet të qeverisë e vetme dhe se slogani “Krejt dhe drejt” është pa lidhje. Ahmeti ka thënë se VV duhet të formojë koalicion me LDK-në ose me PDK-në.
Pjesë nga intervista:
“Unë mendoj se Lëvizja Vetëvendosje nuk duhet të qeverisë vetë. Nëse i ka 58 deputetë dhe po e zëmë që merret vesh me krejt deputetët (e pakicës joserbe) në rastin më të mirë i ka 65 deputetë. Nuk mendoj se në këtë mandat duhet t’i kesh veç 65 deputetë. Slogani “Krejt dhe drejt” është pa lidhje. S’ka nevojë të qeverisësh veç vetë. Thirre dikë prej këtyre subjekteve! Pse mosta thërrasësh? Tash e ke kontrollin e plotë dhe s’mundet askush të të shantazhojë. Nuk mund t’i ndjekësh deputetët në çdo mbledhje, nëse dikush është në pushim apo është sëmurë për të marrë 60 vota. Do të duhej të kërkonte ndonjë koalicion dhe jo pse i duhet, por që të ketë stabilitet. Do të kisha shkuar ja te LDK-ja, ja te PDK-ja”, është shprehur Ahmeti.
