Ish-kryeministri Sali Berisha ka folur sërish pas lajmit që shkaktoi ‘tërmet’ në politikën shqiptare, pasi u shpall non-grata. Në një intervistë për TVKlan, Berisha shprehet me bindje se kjo është një lojë politike e stisur nga kryeministri Edi Rama. Por, pavarësisht këtij pretendimi, Berisha shton se ai është gati të njihet me faktet dhe provat që SHBA-ja mund të ketë për të.
“Ky është një skenar politik i montuar me lobim nga Edi Rama dhe George Soros. Dhe për këtë unë kisha bindjen absolute. Fatmirësisht, deklarata e zëdhënësit të DASH dje ndriçoi një hap të rëndësishëm, ndriçimin e burimeve nga janë marrë të dhënat. Dhe çfarë doli? Burimet ishin NGO lokale, rajonale, ndërkombëtare të gjitha të Sorosit, të gjitha paratë e Sorosit kundër Sali Berishës. Ishin mediat e sponsorizuara nga Soros dhe ishin Edi Rama direkt hetimi qeveritar antikorrupsion. Në këtë deklaratë, Edi Rama del qartësisht si person direkt i përfshirë por pa asnjë diskutim në të gjitha ato që thuhet deklarata nënkuptohet George Soros, multimiliarderi për të cilin unë kam shprehur gjithë mendimet e mia si në Parlamentin shqiptar, si në mediat sociale ashtu dhe në takime ndërkombëtare. Nuk i heq asnjë presje atyre që kam thënë. Në ditët në vazhdim unë do informoj shqiptarët se cilat kanë qenë përpjekjet në vite kundër Sali Berishës të George Sorosit.
Në qoftë se kanë informacione të tjera përsa i përket privatësisë së Sali Berishës, e ftoj Sekretarin Blinken të publikojë çdo gjë pa asnjë lloj hezitimi. Ndërkohë unë kam kontraktuar avokatin dhe kam autorizuar atë për ngritjen e një padie në Gjykatën Korreksionale të Parisit për shpifje. Padia ime nuk atakon vendimin e Sekretarit Blinken për vizën për moshyrjen, jo! Ajo është e drejtë ekskluzive e tij dhe nuk është e drejtë e Sali Berishës viza amerikane. Unë kam paditur dhe qëndroj fuqishëm për shpifjen e cila ka lënduar thellë dinjitetin tim njerëzor.
Gjykata ku unë kam bërë padinë, nëse e merr apo jo, këtë e vendos gjykatësi. Por avokati im gjykon se ekziston e gjithë baza e domosdoshme për ta marrë në shqyrtim. Është e vërtetë që thoshte dhe dje në Zërin e Amerikës Profesor Paul Williams që Sekretari i Shtetit ka imunitet. Pa asnjë asnjë diskutim që ka imunitet në ushtrimin e funksioneve. Por ka një ligj universal për imunitarët. Kanë imunitet për çdo gjë në ushtrimin e funksioneve përveç shpifjes. Shpifja përjashtohet në të gjithë botën demokratike nga imuniteti. Dhe shpifja paditet kudo që ajo shfaqet. Në këtë kontekst, në vlerësimin e avokatit gjykata ka autoritetet të plotë për të bërë interepretimin e imunitetit të z.Blinken. Cilidoqoftë vendimi i gjykatës, unë do të dëshiroja që një vendim pozitiv dhe siguroj që do të jem i hapur për çdo lloj hetimi, por nga ana tjetër, cilido do të jetë vendimi i gjykatës unë absolutisht do të vazhdoj me të gjithë forcën time në rrugë juridike dhe jo politike. Unë jam përballë një sulmi dhe skenari politik. Unë mund t’i përgjigjesha në mënyrë politike edhe kam jo pak miq të cilët do mund të ndihmonin, por kam vendosur të ndjek gjithçka strikt në rrugën juridike për rivendosjen e dinjitetit tim.
