Policia e Beratit njoftoi sot se ka arrestuar dy persona pasi ushtronin aktivitetin e nxjerrjes së pllakave dekorative nga mali i Tomorrit dhe pse i ishte pezulluar licenca subjektit.
Por ndërkohë ka shpallur në kërkim 61-vjeçarin Selim Qama, babai i deputetit Klajdi Qama, i cili banon në Tiranë.
61-vjeçari është shpallur në kërkim, pasi është pronari i një firme që nxirrte pllaka dekorative në mënyrë të jashtëligjshme në Malin e Tomorrit. Ndërkohë që licenca e subjektit që ai drejtonte ishte pezulluar.
Klajdi Qama, hyri në Kuvend nga listat shumëemërore të LSI, pasi deputetët e opozitës dorëzuan mandatet në shkurt të 2019. Qama ishte pjesë e listave për deputetë në qarkun e Beratit. Por, ai ka qenë në herët i dënuar për veprën penale të “Kansojes”. Kjo vepër penale konsiderohet si e rehabilituar dhe nuk i sjell probleme për mandatin.
“Arrestimi i dy shtetasve dhe shpallja në kërkim e administratorit u bë pasi shërbimet e Komisariatit të Policisë Skrapar, në bashkëpunim me punonjës të Administratës së Zonave të Mbrojtura Berat, në aksin dytësor Novaj–Pronovik, në vendin e quajtur “Qafa e Sqepurit”, kanë konstatuar me dy mjete, njëri pa targa, të ngarkuar me pllaka guri dekorative, të nxjerra në Malin e Tomorit, zonë e shpallur “Park Kombëtar”, duke dëmtuar habitatin natyror të zonës së mbrojtur. Dyshohet se këta shtetas materialin e gurit të nxjerrë në mënyrë të paligjshme në këtë zonë e tregtonin duke pasur aktivitetin me status të pezulluar dhe me fatura fiktive. Materialet iu referuan në Prokurorinë pranë Gjykatës së Shkallës së Parë Berat, për veprat penale “Dëmtimi i habitateve në zonat e mbrojtura mjedisore”, ‘’Fshehja e të ardhurave’’ dhe “Mospagimi i taksave dhe tatimeve”, thuhet ndër të tjera në njoftimin e njoftimin e Policisë.
