Partia Demokratike ka shpallur ditën e sotme listën fituese të anëtarëve të Këshillit Kombëtar. PD ka bërë të ditur emrat e 300 anëtarëve që do të jenë në Këshillin Kombëtar të kësaj force politike, për katër vitet e ardhshme.
Në listë, nuk janë shpallur fitues Edit Harxhi, e cila ishte një prej kandidateve për kryetare të PD-së, si dhe Arben Ristani, ish-Sekretar i Përgjithshëm i kësaj partie. Ndërkaq, në listën fituese janë emra të njohur si Aldo Bumçi, Agim Baçi, Andi Lila, Asllan Dogjani, Jemin Gjana, Glauk Olldashi, Ahmet Prençi. Ditën e djeshme, Kuvendi Kombëtar i Partisë Demokratike votoi për anëtarët e rinj të Këshillit.
Kryetari i Komisionit Zgjedhor brenda PD, Jemin Gjana bëri me dije ditën e djeshme se në votime morën pjesë gati 70% e delegatëve. Ditën e djeshme, u miratuan 11 propozimet e Lulzim Bashës në bllok pa asnjë ndryshim nga Kuvendi Kombëtar. Ishte kreu i PD, Lulzim Basha, i cili ditën e djeshme mbajti një fjalim të gjatë për atë që ai e quan “masakër zgjedhore”. Basha theksoi se nuk do ta njohë kurrë rezultatin e zgjedhjeve, teksa nuk ngurroi të shtrijë dorën edhe për kritikët e tij, ku tha se dera për ta do të jetë gjithmonë e hapur.
