Shoferët shqiptarë vijojnë të jenë të pabindur dhe të shkelin rregullat, pavarësisht se ligji po përforcohet.
Së fundmi, Policia Rrugore ka kryer kontrolle me radar në aksin rrugor Elbasan-Tiranë, për parandalimin e shpejtësisë me qëllim parandalimin e aksidenteve që po shtohen dita-ditës.
Sipas njoftimit të policisë gjatë gjithë ditës së sotme, në këtë aks janë evidentuar 11 raste të shpejtësisë që varionte nga 133 km/h deri në 187 km/h, çka rrezikon seriozisht jetën e përdoruesve të rrugës dhe vetë drejtuesve të këtyre mjeteve.
Policia paralajmëron se kontrollet do vijojnë edhe gjatë orëve të mbrëmjes e orëve të para të mëngjesit dhe gjithë fundjavën, ndërsa u bën thirrje drejtuesve të mjeteve të mos fluturojnë në rrugë por të qarkullojnë brenda limiteve të lejuara.
Kujtojmë se aksidentet e shumta rrugore kanë bërë që masat ndaj shoferëve të shtohen dhe në janar policia paralajmëroi se shumë shpejt, përveç dregerit të alkoolit, do përdorë edhe dragerin për të parë nëse drejtuesit kanë konsumuar lëndë narkotike.
Po ashtu, ministri i Brendshëm, Sandër Lleshaj deklaroi se për herë të parë në Shqipëri shoferët do t’i nënshtrohen të ashtuquajturit ‘testi i idiotit’, për të parë gjendjen e tyre psikologjike kur efektivët shohin sjellje të dyshimta.
Ndryshime pritet të bëhen në Kodin Rrugor, ku parashikohet që drejtuesit e rinj të automjeteve të kenë më shumë penalizim se të tjerët dhe kjo masë parashikon që shoferët të cilët kanë më pak se 3 vite që kanë marrë patentën do të ndëshkohen 50 % më shumë për disa nga shkeljet e qarkullimit rrugor, si: parakalimet e gabuara, për përdorimin e alkoolit, mosdhënien e përparësisë, e disa shkelje të tjera.
Masa do merren gjithashtu edhe për këmbësorët, pasi parashikohet një rritje e gjobës për ta, e cila do fillojë nga 1 mijë deri në 4 mijë lekë.
Ndryshime në Kodin Rrugor, ashpërsohen masat për shoferët e rinj dhe këmbësorët
